काठमाडौंको गौरीघाटमा लागेको आगो नियन्त्रणमा आएको छ।
काठमाडौं महानगरपालिका-७ गौरीघाटस्थित टेन्ट पण्डाल राखिएको एक टहरामा भएको आगलागी बिहान ६ बजेपछि नियन्त्रणमा आएको प्रहरी वृत्त गौशालाका इन्स्पेक्टर केशव अधिकारीले जानकारी दिए।
बिहान साढे ४ बजेदेखि आगलागी भएको थियो।
'अहिले नियन्त्रणमा आइसकेको छ, कसरी आगो लाग्यो भनेर बुझिरहेका छौं,' इन्स्पेक्टर अधिकारीले भने।
काठमाडौं महानगरपालिका-७ का वडाध्यक्ष विमलकुमार होडाले आगलागीबाट टहरा नजिक रहेका १/२ वटा घरमा पनि सामान्य क्षति पुगेको जानकारी दिए।
'अहिले आगो नियन्त्रणमा आइसकेको छ, मानवीय क्षति छैन। भौतिक क्षति के कति भयो भनेर विवरण संकलन गर्दैछौं,' उनले भने।
उनका अनुसार ४ वटा दमकल प्रयोग गरी आगो निभाइएको हो।
