एमालेनिकट राष्ट्रिय युवा संघ नेपालका इञ्चार्ज तथा सांसद महेश बस्नेत बौद्धिक वर्ग र मिडियामाथि खनिएका छन्।
शनिबार युथफोर्सको ‘उपत्यका कमाण्ड फोर्स’ गठन गर्ने सिलसिलामा मन्तव्य दिँदै बस्नेत गालीगलौजको शैलीमा प्रस्तुत भए।
बौद्धिक क्षेत्र मिडिया सानो रहेको र तिनलाई सम्झाउन युथफोर्सले बन्दुक बोकिरहन नपर्ने बस्नेतले बताए।
‘हाम्राविरुद्ध बौद्धिक अराजकतावादी शक्तिहरू, केही सीमित मिसन बोकेका मिडियाका साथीहरू र सोसल मिडियामा फेक आइडी बनाएर बसेका साथीहरू हाम्राविरूद्ध प्रचार गर्न सानो संख्यामा आएका छन्,’ उनले भने, ‘यो संख्यालाई सम्झाउन युथफोर्सले कुनै बन्दुक बोक्नुपर्दैन। युथफोर्सले कुनै लडाकु र जुझारु खालका अभियान चलाउनुपर्दैन।’
उनले त्यस्तालाई ठिक पार्न ‘युथफोर्सको मुठी कसेको लोगोको चित्र’ नै काफी भएको बताए।
‘तपाईंहरूले युथफोर्सको मुठी कसेको चित्र देख्नुभएको छ। हात फिँजाउँदा यो हात सलाम हुन्छ भने मुठी कस्दा यो हात बैरीहरूको निमित्त बम भएर निस्किन सक्छ,’ बस्नेतले भने, ‘त्यो भएर युथफोर्सलाई मुठ्ठी नै काफी छ भन्ने कुरा भन्न चाहन्छु।’
उनले बुद्धिजीवीका नाममा अराजकता भइरहेको भन्दै युथफोर्सले ‘ठिक ठाउँमा ल्याइदिने’ चेतावनी दिए। त्यसका लागि युथफोर्सले ‘साइबर सेना’सँग मिलेर काम गर्ने बस्नेतले बताए।
‘बुद्धिजीवीका नाममा कुनै व्यक्तिको, कुनै पार्टीको, कुनै सरकारको कठपुतली बनेर चाबहिलको भट्टीमा जाँड र रक्सी खाएर हाम्रा पार्टीविरुद्ध षडयन्त्र गरेर, हाम्रो पार्टी, विचार, सिद्धान्त, हाम्रो नेता, हाम्रो कार्यकर्ता, शुभचिन्तकलाई बौद्धिक अराजकतावादी शक्तिहरू क्रियाशील भए भने युथफोर्सले साइबर सेनासँग मिलेर सूचना प्रविधिको अधिकतम् उपयोग गरेर साथीहरूलाई ठिक ठाउँमा राख्ने छ। र, बौद्धिक अराजकतावादीहरूको भ्रम फिँजाउने र भ्रमको खेती गर्ने काम बन्द गराइदिने छ,’ उनले भने।
मन्तव्य दिँदै गर्दा बस्नेतले सामाजिक सञ्जालमा लाइक र कमेन्ट गर्नेलाई पनि छोडेनन्।
‘मेरो यो मन्तव्य सुनिरहँदा लाइक र तल कमेन्ट गरिरहनुभएको होला। हिम्मत छ भने एमालेका मान्छेलाई समातेर देखाऊ कहीँ भ्रष्टचारी छन् भने प्रुभ गरेर देखाऊ,’ उनले भने, ‘होइन भने काँक्रो चोरेर आफू खाने अनि बियाँ एमालेको मुखमा लगाएर स्याल हुइँयाँ गर्ने दिन अब सकिए।’
यसो भनिरहँदा बस्नेतले युथफोर्स बुद्धिजीवीहरूको प्रतिरोध गर्न बनाइएको संगठन होइन भन्दै बुद्धिजीवीहरूलाई सम्मान गर्ने बताए।
उनले युथफोर्सले हप्तैपिचेछे तालिम-प्रशिक्षण दिएर, बुद्धिजीवी र खेलाडीहरूको विशेष उपस्थिति गराएर, उनीहरूको ज्ञान, सिप, प्रविधिलाई युवाहरूको बीचमा सम्प्रेषण गरी युवाहरूलाई समाजको एउटा योग्य नागरिक बनाउन प्रशिक्षण दिने र रुपान्तरणको अभियान चलाउने बताए।
उनले युथफोर्स सरकारको विरुद्ध, प्रधानमन्त्री शेरबहादुर देउवाको विरुद्ध खनिएको संगठन भनेर कांग्रेसका मित्रहरूले प्रचार गर्न खोजिरहेको बताए।
उनले भने, ‘म भन्न चाहन्छु। युथफोर्स सरकारको विरुद्ध खोलिएको संगठन होइन। तर सरकारले हिजो केपी ओली सरकारले गरेका राम्रा कामलाई निरन्तरता नदिइकन त्यसलाई भत्काउन खोज्यो भने त्यसविरुद्ध यसले सशक्त ढंगले प्रतिरोध गर्छ।’
उनले दस अर्बको भ्रष्टाचार मुद्दा लागेका विजयकुमार गच्छदारलाई ‘सेटिङ’बाट दस लाख रुपैयाँमा धरौटीमा छुटाउने खालका ‘भ्रष्टाचारीलाई बचाउने अभियान लिएर’ सरकारले काम गरे युथफोर्सले ‘सशक्त अभियान’ चलाउने चेतावनी दिए।