गोविन्दराज जोशी र उनका छोरा दीपकराजले राष्ट्रिय स्वतन्त्र पार्टी (रास्वपा) का सभापति रवि लामिछाने लगायतसँग भेटेर कुराकानी गरेका छन्।
पृथ्वी राजमार्गअन्तर्गत चितवनको चुम्लिङटारमा रहेको सिद्धार्थ होटलमा बिहीबार बिहान जोशी र लामिछानेलगायत बीच भेटवार्ता भएको हो।
जोशी समूहसँग उपनिर्वाचन लगायतका विषयमा कुराकानी गरिएको रास्वपाका एक केन्द्रीय सदस्यले सेतोपाटीलाई बताए।
‘उपनिर्वाचनमा उहाँहरूले तनहुँ-१ मा हाम्रा उम्मेदवार स्वर्णिम वाग्लेलाई नि:सर्त सहयोग गर्ने वचन दिनुभएको छ,’ रास्वपाका ती केन्द्रीय सदस्यले दाबी गरे।
जोशी नेपाली कांग्रेसका पूर्वसहमहामन्त्री हुन्। उनलाई पार्टीले २०७५ मा अनुशासनको कारबाही गरे पनि गत चैत १९ गते कारबाही फुकुवा गरेको थियो। २०७४ मा तनहुँ १ मा कांग्रेसका तत्कालीन उम्मेदवार रामचन्द्र पौडेललाई हराउन भूमिका खेलेको जोशीमाथि आरोप थियो।
यो पनि: कांग्रेस र जोशी समूहबीच मिलेन कुरा
यसपछि कांग्रेस सभापति शेरबहादुर देउवाले धुम्बाराहीमा बोलाएर गोविन्दराजका छोरा दीपकराजसँग पनि छलफल गर्दै मिलेर जानुपर्ने बताएका थिए।
तर गोविन्दराजले बुधबार विज्ञप्ति निकालेर यो चरणका लागि कांग्रेससँगको वार्ता समाप्त भएको घोषणा गरेका थिए।
कांग्रेसले स्पष्ट कुरा नगरी अल्मल्याउने र आलटाल गर्ने गरेको आरोप जोशीको थियो।
कांग्रेससँग कुरा नमिलेपछि जोशीले आज रास्वपाका सभापतिलगायत नेताहरूसँग भेटेका छन्।
वैशाख १० मा हुने उपनिर्वाचनमा तनहुँ १ मा रास्वपाले स्वर्णिम वाग्लेलाई उम्मेदवार बनाएको छ।
गत मंसिर ४ को चुनावमा गोविन्दराज आफैं तनहुँ १ मा उम्मेदवार बनेका थिए। उनी रामचन्द्र पौडेलसँग पराजित भएका थिए। जोशीले ६ हजार ८ सय ७८ मत ल्याएका थिए।
यो पनि: देउवाले भेट्न धुम्बाराही बोलाए, जोशीले राखे पाँच माग
उपनिर्वाचनमा जोशी समूले उम्मेदवार उठाएका छैनन्। जोशी नेपाली कांग्रेस स्वतन्त्र समूहबाट राजनीतिमा क्रियाशील छन्।
दीपकराज पनि गत स्थानीय चुनावमा व्यास नगरपालिकाको मेयरमा स्वतन्त्र उम्मेदवार बनेका थिए। नेकपा एमालेले उनलाई समर्थन गरेको थियो। त्यसबेला दीपकराजले ११ हजार ८ सय २६ मत ल्याएका थिए।
रास्वपा सभापति लगायतसँग भएको भेटवार्ताबारे सोधिएको प्रश्नमा दीपकराजले उपनिर्वाचनबारे कुराकानी नभएको दाबी गरे।
‘रवि लामिछानेसँग अमेरिका हुँदादेखि नै चिनजान हो, स्वर्णिमलगायत बूढानिलकण्ठ स्कुल पढेकाहरू मेरा साथी हुन्, साथीका रूपमा भेट भएको हो,’ जोशीले भने, ‘उपनिर्वाचनबारे खासै कुरा भएन। जोशी समूहसँग रास्वपाले पार्टीका हैसियतमा कुराकानी गरेको छैन। भेटमा उहाँहरू सहयोगको अपेक्षा भने राख्नुहुन्छ।’
आफूहरूले तनहुँका मतदातालाई मतदानमा आफ्नो विवेक प्रयोग गर्न विज्ञप्ति नै जारी गरेर आग्रह गरिसकेको उनको भनाइ छ।
यो पनि: उपनिर्वाचनमा हामी चुप बस्ने निर्णय भएको छ: गोविन्दराज जोशी
‘हामीले हाम्रो आधिकारिक उम्मेदवार खडा गरेका छैनौं। तनहुँमा हामीहरू कुनै दल विशेषको सदस्य नभएकोले स्वतन्त्र छौं। कांग्रेसले उम्मेदवारप्रति गरेको छलकपट निर्वाचन परिणामपछि स्पष्ट हुनेछ। यसबारे हाम्रो कुनै टिप्पणी छैन,’ विज्ञप्तिमा उल्लेख छ, ‘मतदान गर्दा सक्षम, बौद्धिक र तनहुँको प्रतिष्ठालाई राष्ट्रिय राजनीतिमा कायम राख्न सक्ने उम्मेदवार छनौट गरेर मतदान गर्न पनि आफ्ना शुभेच्छुकहरूलाई आग्रह गर्दछौं।’
तनहुँ १ मा नेपाली कांग्रेसले गोविन्द भट्टराई र नेकपा एमालेले सर्वेन्द्र खनाललाई उम्मेदवार बनाएका छन्।
