मंगलबार दिउँसो प्रहरी वृत्त गौशाला गेट अगाडि विद्यार्थीहरूले चाबहिलस्थित सेन्ट लरेन्स कलेजको टिसर्ट जलाए।
शिक्षकले छात्राहरूमाथि गरेको यौन दुर्व्यवहारको आक्रोश उनीहरू पोखिरहेका थिए।
बिहान ६ बजेदेखि सुरू भएको आन्दोलन दिनभरि नै चल्यो। शिक्षक तथा व्यवस्थापन संकायका संयोजक जनार्दन अधिकारीले छात्रामाथि यौन दुर्व्यवहार गरेको भन्दै विद्यार्थीहरू आन्दोलित बनेका हुन्।
आन्दोलन कलेजबाट सुरू भएको थियो। नाराबाजी तथा तोडफोड गरेपछि विद्यार्थीहरूलाई कलेज परिसरबाट हटाइएको थियो। त्यस्तै अधिकारीलाई पनि त्यहीँबाट नियन्त्रणमा लिएर प्रहरी वृत्तमा ल्याइयो।
पछि विद्यार्थीहरूले वृत्तमा पुगेर प्रदर्शन गरे।
अधिकारीलाई कलेज प्रशासनले नै संरक्षण गरेको भन्दै उनीहरू आक्रोशित थिए। नाराबाजी गर्दै विरोध प्रदर्शन गरिरहे।
अहिले प्रहरीले अधिकारीलाई पक्राउ गरिसकेको छ। अर्का शिक्षक राजनकुमार पौडेल पनि प्रहरी नियन्त्रणमा छन्। उनीमाथि पनि यौन दुर्व्यवहारको आरोप छ।
पक्राउ परे पनि ती शिक्षकले विद्यार्थीहरूसँग माफी माग्नुपर्ने भन्दै विद्यार्थीहरूले नाराबाजी गरिरहेका छन्।
कलेज प्रमुख, प्रिन्सिपल, पीडित बालिकाका अभिभावकहरू पनि त्यहीँ छन्। अधिकारीविरूद्ध हाल कक्षा ११ का तीन जना विद्यार्थीले जाहेरी दिइसकेका छन्।
उनीहरूले जाहेरी दिएपछि कक्षा १२ का थप दुई जना छात्राले पनि आफूहरूमाथि ती शिक्षकले दुर्व्यवहार गरेको भनेका छन्। यद्यपी उनीहरूले जाहेरी दिइसकेका छैनन्।
अधिकारीमाथि विद्यार्थीहरूलाई अनैतिक तरिकाले छुने, मेसेजहरू पठाउने लगायत गर्ने गरेको आरोप छ।
पीडित छात्राको घर नजिकै भएको कारण उनलाई आफूसँगै बस्न समेत भनेको एक विद्यार्थीले बताइन्।
‘विद्यार्थीलाई शिक्षकले बिहे गरेपछि बुढीसँग तीन महिनामात्रै रमाइलो हुँदो रहेछ विल यू बी माई सेक्स पार्टनर भनेका रहेछन्,’ ती विद्यार्थीले भनिन्, ‘त्यहाँबाट भाग्न खोज्दा टेबलमा रेस्टिकेट पेपर राखेर कसैलाई भनिस् भने रेस्टिकेट गरिदिन्छु भनेका रहेछन्।’
ती विद्यार्थीले थपिन्,‘साथीहरूसँग हिँड्दा पनि बोलाएर उनीहरूसँग किन हिँडेको, भन्ने गरेको। कलेज फी, बस भाडा पनि लिन्नँ कसैलाई नभन् भनेका रहेछन्।’
यसरी आफूहरूमाथि यौन दुर्व्यवहार भएको भन्दै कलेज प्रशासनलाई जानकारी गराए पनि बेवास्ता गरेको विद्यार्थीहरूको आरोप छ।
‘व्यवस्थापन संकायका कोओर्डिनेटर सर जनार्दन अधिकारीले कलेजमा ११ कक्षामा पढ्ने विद्यार्थीलाई बारम्बार यौन दुर्व्यवहार गर्नुभएको रहेछ। एक दुई महिनादेखि नै यस्तो भइरहेको रहेछ,’ एक विद्यार्थीले भने, ‘घटनाबारे प्रशासनलाई भनेको अलि अगाडि नै हो। हिजो विद्यार्थीका अभिभावक समेत कलेजमा पुग्नुभएको थियो। तर प्रशासनले केही कारबाही नगरेपछि हामीले आन्दोलन नै गर्यौं। कलेजले हलुका रूपमा लियो त्यसैले।’
कुनै कारबाही गर्नु वा प्रहरीलाई खबर गर्नुको सट्टामा आन्तरिक रूपमै मिलाउने काम भइरहेको १२ कक्षामा अध्ययनरत अर्का विद्यार्थीले बताए।
‘कलेजले यसबारे जानकारी पाइसकेपछि तुरून्तै कारबाहीको प्रक्रिया अगाडि बढाउन पर्थ्यो नि! भित्रैभित्र मिलाउनुपर्ने चाहिँ किन हो?,’ उनले प्रश्न गरे, ‘कलेजलाई एक महिना अगाडि पनि जानकारी गराएको रहेछ। तर फेरि दुई हप्ता अगाडि पनि जानकारी गराएका थिए। तर भित्रै-भित्र मिलाउने प्रयास गरे।’
भित्रैभित्र मिलाउने प्रयास गरेका शिक्षकहरूले अहिले प्रहरी प्रशासनलाई अरू नै बयान दिइरहेको उनले बताए।
यता कलेजका प्रमुख केशव दंगलले भने गल्ती हुनेलाई कारबाही हुनुपर्ने बताए। विद्यार्थीहरूको मागमा समर्थन नै भएको उनले बताए।
‘गल्ती हुनेलाई कारबाही हुनुपर्छ भन्ने हाम्रो कलेजको माग नै हो। हामीले समर्थन गरेका छौं। अनुसन्धान अघि बढिरहेको छ।’
प्रहरी सोधपुछमा रहेका उनले थप बोल्न चाहेनन्।
प्रहरी वृत्त गौशालाले थप अनुसन्धान अघि बढाएको बताएको छ।