काठमाडौं रेजर्स एफसी नेपाल सुपर लिगको फाइनलमा प्रवेश गरेको छ।
बिहीबार दशरथ रंगशालामा भएको दोस्रो क्वालिफायरमा ललितपुर सिटी एफसीलाई ३-० गोलले पराजित गर्दै काठमाडौं फाइनलमा पुगेको हो।
अब उपाधिका लागि काठमाडौंले धनगढी एफसीसँग आगामी शनिबार प्रतिस्पर्धा गर्नेछ। यसअघि धनगढीले काठमाडौंलाई नै हराएर फाइनलमा स्थान बनाएको थियो।
पराजित भएको काठमाडौंले भने दोस्रो अवसर पाएको थियो। काठमाडौंले एलिमिनेटरमा बुटवल लुम्बिनी एफसीलाई पराजित गरेको ललितपुरसँग प्रतिस्पर्धा गरेको हो।
बिहीबार काठमाडौंलाई जित दिलाउन मेसौकेले दुई गोल गरे। जारी प्रतियोगितामा सर्वाधिक गोलकर्ताको सूचीमा रहेका उनले ७ गोल गरिसकेका छन्।
खेलको १५ मिनेटमा प्राप्त पेनाल्टीमा उनले टिमका लागि पहिलो गोल गरे। त्यसअघि ललितपुरका कमल श्रेष्ठले मेसौकेलाई डिबक्स भित्र लगाएका थिए।
यस्तै उनले खेलको २२ मिनेटमा अर्को गोल गर्दै काठमाडौंको अग्रता दोब्बर पारेका थिए।
काठमाडौंका लागि तेस्रो गोल स्टेफिन बिनोङले गरे। उनले खेलको ६० मिनेटमा गोल गर्दै काठमाडौंलाई ३-० गोलले अघि बढाएका थिए।
खेलपछि मेसौकेले फाइनल प्रवेश गरेमा खुसी गरेको बताए। उनले मैदानमा उत्कृष्ट खेल देखाउन सकेकाले फाइनल पुग्न सकेको समेत बताए।