नविल बैंकका प्रमुख कार्यकारी अधिकृत अनिलकेशरी शाहले कोरोनाका कारण भएको लकडाउनले समग्र बैंकिङ प्रणालीमै परिवर्तन ल्याउनसक्ने बताएका छन्।
लकडाउनका कारण बैंकिङ सेवाको प्रणाली परिवर्तन भएर नेपालको समग्र वित्तीय प्रणाली आधुनिक हुने उनको प्रक्षेपन छ।
लामो समयदेखि डिजिटल बैंकिङमा लगानी गर्दै आएको भएपनि ग्राहक अभ्यस्त नहुँदा उत्साही नभएका नेपाली बैंकलाई केही राहत मिल्ने उनको भनाइ छ।
'हामीले पहिलेदेखि लगानी गरेपनि नचलेपछि केन्याको एमपैसाको मोडल अध्ययन गरेका थियौ। त्यहाँ असुरक्षाका कारण एम पैसा चलेको पायौं। हामीले १० वर्षदेखि सेवा ल्याउँदा पनि ग्राहकमा चासो पाइएको थिएन तर अहिले कोरोनाले डिजिटल बैंकिङ प्रोत्साहन गरेको छ। केन्यामा असुरक्षाले चलेको थियो भने नेपालमा कोरोनाले चल्ने देखिएको छ' शाहले भने।
कोरोना संक्रमणको उच्च जोखिम बढेपछि संसारभर नै सम्पर्क बिहिन भुक्तानी तथा किनमेल बढीरहेको छ। नेपालमा सम्पर्क बिहिन वित्तिय सेवा बढीरहेको छ। लकडाउन अवधिमामात्र ३ गुणाले डिजिटल बैंकिङ बढेको शाहले जानकारि दिए।
अहिले बढीरहेको ग्राहकको बानीलाई निरन्तरता दिनका लागि बैंकहरुका अगाडि चुनौति थपिएको उनको बुझाइ छ।
'बैंकहरुलाई अबको चुनौति के हो भने यो बढीरहेको लगावलाई कसरी निरन्तरता दिने?लकडाउन सकिएपछि। आउनेदिनमा कसरी हुन्छ प्रोत्साहन गर्नुपर्छ' उनले भने।
बैंकहरुले डिजिटल बैंकिङ सेवालाई युवा लक्षित गरेर जाँदा सबैभन्दा बढी फाइदा हुने उनको भनाइ छ।
डिजिटल सेवामा नयाँ र आधुनिक सेवा थप गर्दै जानुपर्ने उनले बताए। नयाँ सेवामा गरेको लगानीले किफायति थप्ने भएकाले कठिन नहुने उनको भनाइ छ।
'सम्पर्कबिहिन भुक्तानीका लागि नविल बैंकले क्यूआर कोड सिस्टम ल्याउँदै छ। यो आयो भने हामी किराना पसलसम्म पुग्छौ। यसो भएमा एक पाउ तरकारी किन्ने मान्छेले पनि अनलाइन भुक्तानी गर्नसक्छ। यस्तै खाले सेवा वित्तीय क्षेत्रमा अरु पनि आउलान्। त्यसपछि हामी नगदविहिन कारोबारमा परिपक्क हुँदै जाने छौ' शाहले भने।
