लकडाउन लागू भएपछि पहिलाे दिन खुलेको सेयर बजारमा साढे १ घण्टा नपुग्दै सर्किट ब्रेक लागेको छ।
११ बजे खुलेको सेयर बजार लगातार ओरालो झरेपछि १२ बजेर २३ मिनेट जाँदा सर्किट लाग्न पुगेको हो। सर्किट लागेपछि आजका लागि काराेबार स्थगित गरिएकाे छ।
कारोबार खुलेकोभन्दा २ प्रतिशतले बजार घटे वा बढेपछि सर्किट ब्रेक लाग्ने व्यवस्था गरिएको छ।
सो व्यवस्थाअनुसार परिसूचक नेप्से २५ अंक अर्थात २ प्रतिशतले घटेपछि सर्किट लागेको हो। यस दिन जम्मा १० करोड रुपैयाँको सेयर किनबेच भयो।
बैंकिङ २६, होटल ३, विकास बैंक १५, जलविद्युत १५, फाइनान्स ३, निर्जीवन बीमा ७२, उत्पादन ३४, अन्य १९, माइक्रोफाइनान्स १८ र जीवन बीमा समूह १५७ अंकले घटे।
यस दिन नागरिक लगानी कोषको सबैभन्दा बढी रकमको सेयर कारोबार भएको छ। सो कम्पनीको मात्रै ८ करोड ८८ लाख रुपैयाँको कारोबार भयो।
यस दिन सबै कम्पनीको सेयर मूल्य घटेको छ।
जनउत्थान सामुदायिक लघुवित्तका लगानीकर्ताले सबैभन्दा धेरै गुमाए। हिमालयन बैंक, नविल बैंक, नागरिक लगानी कोषका लगानीकर्ताले ३ प्रतिशत बढी गुमाए।
