यसपालि दशैंमा कहाँ कपडा किन्ने सोच बनाउनु भएको छ? दोधारमा हुनुहुन्छ या ठूल्ठूला मलमा किन्ने सोच बनाउनु भएको छ। त्यसोभए एकचोटी भृकुटीमण्डप जानुस्। त्यहाँ सस्तो मूल्यमा नेपाली कपडा पाउन सक्नुहुनेछ।
तपाइँले मेला हेर्नुभयो यस्तो कपडा पनि नेपालमा बन्छ र जस्तो लाग्न सक्छ। तपाइँलाई थाइल्याड, भारतमा बनेको भनेर बेचिएको कपडा नेपालमै पनि बनेको हुन सक्छ।
एभरेष्ट टेक्सटाइल, प्रगती टेक्सटाइल जस्ता उद्योगहरूले नेपाली कपडा उत्पादन गर्दै आएका छन्। भने रिलायन्स, जगदम्बा लगायत उद्योगहरू त्यस्ता कपडाका लागि चाहिने धागो उत्पादन गर्दै आएका छन्।
‘स्वदेशी लगाउँ, स्वदेशी बनौं’ भन्ने मूल नाराका साथ बिहीबारदेखि भृकुटीमण्डपमा स्वदेशी कपडाको मेला चलिरहेको छ।
मेलामा सटिङ–सुटिङ, स्कुल ड्रेस, सर्ट–पाइन्ट, कुर्था–सुरूवालदेखि घरमा प्रयोग हुने बेडकबर, कुशन, तकिया, खोललगायत सम्पुर्ण सामानहरू राखिएको मेलाका संयोजक पवन गोल्यानले बताए।
नेपालमा उत्पादन भएका कपडा भारतकोभन्दा गुणस्तर भएको एभरेष्ट टेक्सटाइल उद्योगका प्रोपाइटर बज्रंगलाल तोदीले बताए।
‘ग्राहक बाहिर देशको कपडा भनेपछि जति पनि मूल्य तिर्छन् तर यी नेपाली कपडा विदेशका भन्दा पनि गुणस्तर छन्’, उनले भने।
उनका अनुसार मेलामा किन्ने ग्राहकले २० देखि ५० प्रतिशतसम्म छुट पाउनेछन्।
सिरकका खोल, तन्दा, सप्तरङ्गी दरी, सिरक पल्ला लगायतका सामानमा ५० प्रतिशतसम्म छुट दिएको उद्योगी रक्की महर्जनले बताए। ‘बाहिर मिडियम साइजको सुतिको बेडकभर १७ सय हाराहारी पर्छ भने यहाँ ग्राहकले ५० प्रतिशत छुट पाउँछन्’, उनले भने।
दशैंको बेलामा बाहिर किन्दा गुणस्तरमा ग्राहक ठगिने हुनाले पनि यहाँ किन्दा राम्रो हुने उनी बताउँछन्।
‘हामीले व्यापार गर्ने उद्देश्यले मेलामा राखेका होइनौँ, नेपाली कपडा चिनाउन मेला आयोजना गरिएको हो। यहाँ सामान किन्दा ग्राहकलाई फाइदा हुन्छ’, उनले भने।
मेलामा भेलाका कुर्थासुरूवाल, पर्दा, सल, पछ्यौरा लगायतका सामानमा नेपो उद्योगले पनि फ्याक्ट्री कै मूल्यमा दिएको उद्योगका सेल्स मार्केटिङ माधब पोखरेलले बताए।
‘अहिले हामीले फ्याक्ट्रीकै मूल्यमा दिएका छौं। वास्तवमा हामीले डिस्ट्रीब्युटरलाई दिन्छौँ, उसले होल्सेलरलाई दिन्छ। रिटेलबाट उपभोक्तासम्म पुग्ने बिचको मूल्य अहिले ग्राहकले छुट पायका छन्’, उनले भने।
मेलामा जाडोमा लगाइने सट पाइन्टका कपडा, टप्स, कुर्थासुरूवाल पनि प्रदर्शनमा राखिएको छ।