अर्थमन्त्री युवराज खतिवडाले विद्युत निर्यातका लागि बजारको खोजी भइरहेको बताएका छन्।
काठमाडौंमा जारी उर्जा सम्मेलनलाई शुक्रबार सम्बोधन गर्दै उनले विद्युत निर्यातका लागि विभिन्न मुलुकसँग कुरा भइरहेको बताए। विद्युत उत्पादन बढाउने उद्देश्यले वैदेशिक लगानी आकर्षित गर्न सरकारले विभिन्न ऐन, कानुनमा सुधार गरेको उनको भनाइ छ।
सरकारले १० वर्षमा १५ हजार मेगावाट विद्युत उत्पादन गर्ने लक्ष्य लिएको छ। तर आन्तरिक खपत १ हजार ५ सय मेगावाट मात्रै हुने भएकाले विद्युत निर्यातका लागि बजारको खोजी गर्नु परेको मन्त्री खतिवडाको भनाई छ। उनले डलरमा हुने उतारचढावका कारण नोक्सानी व्यहोर्नुपर्ने अवस्था आउन नदिन ‘हेजिङ’ ऐन लागू गरी कार्यान्वयनमा ल्याइएकाले ढुक्क भएर लगानी गर्न बाह्य मुलुकका लगानीकर्तालाई आग्रह गरे।
अर्थमन्त्री खतिवडाले विश्व बैंकको पछिल्लो तथ्यांकले पनि नेपालमा लगानीको उपयुक्त वातावरण बनेको देखिएकाले लगानी गर्न डराउनुपर्ने अवस्था नरहेको बताए। उनले जलविद्युत क्षेत्रमा लगानी गरेर पूँजी बजारबाट लाभ लिन पनि लगानीकर्तालाई आह्वान गरे।
