संसारकै धनी व्यक्ति जेफ बेजोसलाई एसियाकै धनी व्यक्ति मुकेश अम्बानीले चुनौती दिएका छन्।
अम्बानीले बेजोसको अनलाइन सपिङ कम्पनी अमेजनलाई भारतमा पछाडि पार्ने गरी नयाँ व्यवसाय सुरू गरेका छन्।
बिबिसीका अनुसार अम्बानीको रिलायन्स इन्डस्ट्रीले घरायसी र किराना सामान डेलिभरीको काम थालेको हो।
जिओमार्ट नाम दिइएको यो व्यवसाय रिलायन्स रिटेल र रिलायन्स जिओका लाखौं उपभोक्ता मार्फत् सञ्चालन गरिने कम्पनीको योजना छ।
यो नयाँ इ-कमर्स व्यवसायले भारतमा हाल भइरहेका अनलाइन रिटेलर कम्पनीहरू प्रभावित हुने अनुमान गरिएको छ।
जिओमार्टले निःशुल्क र चाँडो डेलिभरी दिने कम्पनीको दावी छ।
यसमा हाल किराना सामानहरू मात्र छन् जहाँ ५० हजार भन्दा बढी आइटम सूचीकृत भइसकेका छन्।
जिओमार्टले स्थानीय पसलहरूसँग समन्वय गरेर उपभोक्तालाई एपका मार्फत् सामान उपलब्ध गराउने बताइएको छ।
हाल भारतको इ-कमर्स बजारमा अमेजन र फ्लिपकार्टको प्रभाव सबभन्दा बढी छ।
अम्बानीको नयाँ कम्पनीले यी दुवैलाई पछि पार्ने लक्ष्य राखेको बताइएको छ।
