एक सर्वेक्षणले कोरोना भाइरसका कारण चीनका हजारौं सिनेमा घर सदाका लागि बन्द हुनसक्ने देखाएको छ।
चीन संसारमा सबैभन्दा धेरै सिनेमाघर भएको मुलुक हो र जनवरी २३ देखि त्यहाँका सबै हल बन्द छन्।
गत वर्षमात्र चीनमा ९ हजार ७ सय ८ वटा नयाँ पर्दा थपिएका थिए। चीनमा सिनेमाका कुल ६९ हजार ७ सय ८७ वटा पर्दा छन्।
चीन अमेरिकापछि विश्वको दोश्रो ठूलो सिनेमा बजार हो।
कोरोना महामारीका कारण हालसम्म त्यहाँ ४.२४ बिलियन अमेरिकी डलर नोक्सान भइसकेको एक चिनियाँ अधिकारीले जनाएका छन्।
चीनको चाइना फिल्म एसोसिएसन(सिएफए), चाइना फिल्म डिस्ट्र्बियूसन र स्क्रिनिङ एसोसिएसन र त्यहाँको अग्रणी सिनेमा हल चेन वान्डाले गरेको सर्वेक्षणले हलहरूको धमिलो भविष्य देखाएको हो।
'महामारीको प्रकोप निरन्तर जारी रहे ४० प्रतिशत बढी हलहरूलाई टिक्न मुश्किल पर्नेछ', अध्ययन रिपोर्टमा भनिएको छ। सर्वेक्षण १ सय ८७ वटामा हलमा गरिएको थियो।
यस रिपोर्टको अर्थ हजारौं सिनेमा हल बन्द हुनु हो। यसबाट ठूलो संख्यामा रोजगारी पनि गुम्नेछ।
चीन सरकारले संक्रमणले कम भएका क्षेत्रमा क्षमता कम गरेर तथा नियमितरूपमा डिस्इन्फेक्ट गरेर खोल्न सकिने जनाए पनि त्यो सुरू हुनसकेको छैन।
कोरोनाको संक्रमण कम भएपछि केही स्थानमा हलहरू खुल्ला गरिएको भएपनि संक्रमणको दोश्रो लहरलाई ध्यानमा राख्दै पुनः बन्द गरिएको थियो।
सर्वेक्षणले महामारी अन्त्यपछि सिनेबजार तङ्रिन लामो समय लाग्ने देखाएको छ।
सर्वेक्षणका अनुसार गत वर्ष ९.०१ बिलियन डलरको कारोबार गरेको चिनियाँ वक्सअफिस ३.०५ बिलियन अमेरिकी डलरमा खुम्चिने देखाएको छ।