गोर्खा ब्रुअरीले आफ्ना कुनै पनि उत्पादनको गुणस्तरमा सम्झौता नगरेको दावी गरेको छ।
कम्पनीले ग्राहकको स्वास्थ्यमा हानी हुने कुनै पनि काम नगरेको गोर्खा ब्रुअरीका डेपुटी म्यानेजिङ डिरेक्टर सुरेन्द्र सिलवालले आइतबार पत्रकारहरूसँगको कुराकानीमा जानकारी दिए।
‘पहिलो कुरा त काल्सबर्ग कम्पनीले पठाएको विशेषज्ञले जे रेसेपी दिन्छन्, हामीले त्यहीअनुसार बियर बनाउने हो। हामीले चाहेर पनि गुणस्तर घटाउन सक्दैनौं,’ उनले भने।
बियरलाई दैनिक रूपमा ल्यावमा परीक्षण गरिने र ग्राहकको स्वास्थ्यलाई मध्यनजर गर्दै बजारमा पठाइसकेको बियरको पनि नमूना उठाएर नियमित परीक्षण हुने गरेको उनले जानकारी दिए।
'कार्ल्सबर्ग कम्पनीले आफ्नो झन्डै २ सय वर्षको गुणस्तरको विश्वास जोगाउन पनि कडा प्रोटोकल पालना गर्छ, त्यसकारण उनीहरूले हाम्रो कम्पनीमा प्रतिनिधि नै खटाएको छ। त्यस्तै हामी आफैं पनि ग्राहकप्रति जिम्मेवार छौं। ग्राहकको भरोसा माथि ठेस लाग्ने काम हामीबाट कदापी हुँदैन,' सिलवालले थपे।
उनले हुँदै नभएको विषयमा गुणस्तरको कुरा जोडेर आफूहरूलाई बदनाम गर्न खोजिएको पनि उल्लेख गरे।
'राजश्वको विषय क्लियर नहुँदा हामी अलमलमा थियौं। त्यसका लागि हामीले सम्बन्धित निकायसँग छलफलमै छौं। यो विषयलाई घुमाएर विनाकारण गुणस्तरसँग जोडेर हामीलाई बदनाम गर्न खोजिएको हो,' उनले भने।