नेपालको पहिलो मदिरा उत्पादक कम्पनी दि नेपाल डिस्टिलरिजले आफ्नो बहुचर्चित खुकुरी ब्राण्डअन्तर्गत 'खुकुरी ह्वाइट रम' बजारमा ल्याएको छ।
यो सँगै खुकुरी ब्राण्डको पोर्टफोलियोमा खुकुरी ट्रिपल एक्स, खुकुरी स्पाइस्ड, र खुकुरी ह्वाइट रम गरी तीन प्रकारका रमहरू भएका छन्।
खुकुरी ह्वाइट रम एक स्पष्ट पारदर्शी रम हो, जसले गर्मीयामका पेयहरूको माग पूरा गर्ने कम्पनीको दाबी छ।
यसलाई बरफ (आइस) हालेर वा कोला वा जुस जस्ता मिक्सरहरूसँग पनि पिउन सकिन्छ। यसलाई ककटेल बनाउन पनि प्रयोग गर्न सकिने बताइएको छ।
ह्वाइट रमको स्थानीय उत्पादन नहुने र आयातित मदिरामा प्रतिबन्धका कारण नेपालका बारहरूले हिजोआज मोहितो बनाउन अन्य पारदर्शी र सेतो रक्सीको प्रयोग गर्नुपर्ने बाध्यता छ।
खुकुरी ह्वाइट रम बजारमा आएसँगै अब नेपाली उपभोक्ताहरूले फेरि ह्वाइट रमसँग मोहितो पिउन सक्नेछन्।
नेपालको मौलिक स्वादलाई कायमै राखेर कम्पनीले खुकुरीको ह्वाइट रम तयार गर्न २ वर्षभन्दा बढी समय लगाएको थियो।
ह्वाइट रमलाई विश्वस्तरीय तरल पदार्थको रुपमा विकास गर्नुअघि परीक्षण र प्रतिक्रियाको श्रृंखलाहरू सञ्चालन गरिएका थिए।
सो क्रममा नेपालका सबै प्रिमियम बार र रेष्टुरेन्टहरूबाट समर्थन र सहयोग प्राप्त भएको कम्पनीले बताएको छ।
दि नेपाल डिस्टीलरिजका महाप्रबन्धक शुभाष लामिछानेले खुकुरी रमको ब्राण्ड पोर्टफोलियोमा विश्वस्तरीय ह्वाइट रम थपिएकोमा आफूलाई गर्व महसुस भएको बताए।
उनले भने 'हामीले रमको आधारभूत पोर्टफोलियो अब पूर्ण गरेका छौं। हामीले उत्पादन गर्दै आएका रमका अन्य भेराइटी निर्यात गरे जस्तै ह्वाइट रम पनि निर्यात गरी विदेशी मुद्रा आर्जन हुने र यसबाट राष्ट्रिय अर्थतन्त्रलाई थोरै भए पनि टेवा पुग्ने विश्वास लिएका छौं।'
