प्रमुख प्रतिपक्ष दल नेपाली कांग्रेसले सबै प्रदेशको सन्तुलित विकास हुनेगरी आगामी आर्थिक वर्षको बजेट ल्याउन सरकारको गम्भीर ध्यानाकर्षण गराएको छ।
नेपाली कांग्रेसका नेता ज्ञानेन्द्रबहादुर कार्कीले सबै प्रदेशको सन्तुलित विकास हुनेगरी बजेट नल्याए त्यसले असन्तुष्टि जन्माउने र त्यो विद्रोहको रूपमा परिणत हुनेतर्फ पनि सरकारलाई सचेत गराए।
बुधबार संघीय संसदको अर्थ समितिको बैठकमा बोल्दै उनले पहुँच र प्रभावको आधारमा नभइ जनताको आवश्यकताको आधारमा प्रतिनिधिसभाको सबै निर्वाचन क्षेत्रमा पनि बजेटको व्यवस्था गर्न सरकारसँग माग गरे।
कांग्रेस नेता कार्कीले एक वर्षे कार्यकाल गफमा मात्रै बितेको दाबी गर्दै आगामी ४ वर्ष सदुपयोग गरेर अघि बढ्न पनि सरकारलाई सुझाव दिए।
उनले बजेटको प्राथमिकता कार्यान्वयनमा विशेष ध्यान दिन पनि अर्थ मन्त्रालयलाई आग्रह गरे। पूर्वअर्थमन्त्री समेत रहेका नेता कार्कीले आगामी आर्थिक वर्षको बजेटले गरिबी निवारण, बेरोजगारी समस्या समाधानलाई उच्च प्राथमिकता दिनुपर्ने आवश्यकता पनि औंल्याए।
