काठमाडौंको नागढुङ्गा देखि धादिङको सिस्नेखोला जोड्ने सुरुङमार्ग निमार्ण प्रकृया अघि बढ्ने भएको छ । सुरुङ मार्गको धादिङतर्फ पर्ने जग्गाका धनिले यसअघिको सहमती अनुसार मुअब्जा लिन नमानेका कारण विबाद बढेको थियो ।
काठमाडौं, साउन २१
स्थानीयले काठमाडौं तर्फकै मूल्यमा मुअब्जा माग गरेपछि सहमती हुन सकेको थिएन । आयोजनाले भने काठमाडौंकै मूल्यमा मुअब्जा दिन नसकिने बताउँदै आएको थियो ।
मंगलबार बसेको बैंठकले यसअघिनै निर्धाण गरेको दरमा मुअब्जा लिने सहमती भएको आयोजना प्रमुख श्याम खरेलले बताए । यसअघि प्रतिआना ७ लाख देखि ९ लाख मुअब्जा दर निर्धारण गरिएको थियो ।
आयोजनाको लागि धादिङ तर्फको १ सय ९ रोपनी जग्गा आवश्यक पर्छ । त्यसमा ४४ रोपनी व्यक्तिगत नाममा रहेको छ । बाँकी रहेको जग्गा श्री ५ को बायुगुठी र लालपुर्जा नभएको जग्गा छन् ।
आयोजनाले गुठीको जग्गाको शतप्रतिशत मुअब्जा दिने माग मन्त्री परिषदको बैठकमा लौजाने जनाएपछि स्थानीय सहमतीमा आउन राजी भएका हुन् । यसअघि गुठी जग्गाको मुअब्जा एक तिहाइ मोहिको र बाँकी दुई तिहाइ गुठी संस्थानमा जान्थ्यो ।
यस्तै, आयोजनाले नियमित प्रकृयाबाट मुअब्जा वितरण गर्दा समय लाग्ने भएकाले त्यसलाई पनि फास्ट ट्रयाक बाट छिटो काम सक्न मन्त्री परिषद बैठकबाटै निर्णय गराउने पहल गर्ने सहमती भएको छ ।
मुअब्जामा बिबाद सुल्झेसँगै सडक विभागले आयोजनाको सहमतीका लागि जापानी अन्तर्राष्ट्रिय सहयोग नियोग (जाइका) पठाएको छ । जाइकाले एक हप्तामा सहमती पत्र पठाउने र त्यसको तीन हप्तामा निमार्ण कम्पनीसँग ठेक्का सम्झौता हुने आयोजनाले जनाएको छ । आयोजना जाइकाको आर्थिक सहयोगमा निमार्ण गर्न लागिएको हो ।
ठेक्का सम्झौताको प्रकृया सकेपछि दशैपछि निमार्ण सुरु हुने आयोजनाले जनाएको छ ।
