नेपालमा हवाई दुर्घटना प्राय: भइरहन्छन्। हेलिकप्टरदेखि नियमित उडानका जहाजसम्म बेलाबेला दुर्घटान हुने गरेका छन्। दुर्घटना पछि छानविन समिति बन्छ। त्यो समितिले प्रतिवेदन दिन्छ। त्यसरी प्रतिवेदनमा सुधार गर्नुपर्ने भन्दै समितिले सिफारिस गर्छ।
समितिले यस्तो सिफारिस निकाय तोकेरै गर्ने गरेको छ।
हवाई क्षेत्रको नियमक नागरिक उड्डयन प्राधिकरण, वायुसेवा सञ्चालकलाई समितिले गर्नुपर्ने सुधार भन्दै सिफारिस गर्छ। समितिले सिफारिस गर्ने मुख्य निकाय भनेको संस्कृति पर्यटन तथा नागरिक उड्डयन मन्त्रालय पनि हो।
धेरैजसो नीतिगत सुधारका लागि मन्त्रालयलाई समितिले सिफारिस गरेको हुन्छ। समितिले भविष्यमा यस्तो दुर्घटना नहोस भनेर सावधानी अपनाउनु गर्नुपर्ने सुधार भनेर दिइएको सुझाव तथा सिफारिस लत्याउनेमा मन्त्रालय नै अगाडि देखिएको छ।
नागरिक उड्डयन प्राधिकरणले वार्षिक रुपमा प्रकाशित गर्ने एभियसन सेफ्टी रिपोर्ट २०१९ले सिफारिस लत्याउनेमा एक नम्बरमा मन्त्रालयलाई राखिदिएको छ।
सन् २००९ देखि २०१८ सम्मका दुर्घटना र तीनको छानविन गर्न बनेको समितिले गरेका सिफारिस कार्यान्वयको अवस्थाको मूल्यांकन गर्दै रिपोर्टले यो तथ्य औल्याएको हो।
रिपोर्टअनुसार मन्त्रालयले कूल सुझावको २७ प्रतिशतमात्र कार्यान्वयन गरेको छ। अर्थात् मन्त्रालयले समितिले सुधार गर्नू भनेर दिएको १०० मा २७ सुझावमात्र कार्यान्वयन गरेको हो। मन्त्रालयले २७ प्रतिशत नै आंशिक कार्यान्वयन गरेको छ भने ४४ प्रतिशत कार्यान्वयन नगरी टारेको छ।
यसरी आएका सुझाव कार्यान्वयनमा एयरलाइन्स कम्पनीहरु सबैभन्दा अघि देखिएका छन्। उनीहरुले ९३ प्रतिशत कार्यान्वयन गरेका छन्। हवाई क्षेत्रको नियमक नागरिक उड्डयन प्राधिकरणले पनि ८४ प्रतिशत कार्यान्वयन गरेको छ।
मन्त्रालय नै सुझाव कार्यान्वयन नगर्दा नेपालको हवाई क्षेत्रको इमेज राम्रो नभएको सेवाप्रदायकका प्रतिनिधहरुले गुनासो गरेका थिए। सिम्रिक एयरलाइन्सका अध्यक्ष रामेश्वर थापाले सेवाप्रदायक र नियमक एकै ठाउँमा हुँदा युरोपले नेपाली आकाशलाई कालोसूचीमा राखेको र यो मन्त्रालयकै कमजोरीका कारण भएको आरोप लगाएका थिए।
रिपोर्ट सार्वजनिक कार्यक्रममा बोल्दै संस्कृति पर्यटन तथा नागरिक उड्डयन मन्त्री योगेश भट्टराईले आफू सुझाव कार्यान्वयमा गम्भिर हुने प्रतिबद्धता जनाए। यसअघि पनि राम्रै काम भएकैले सेफ्टीको अवस्थामा सुधार भएको र यो भन्दा सुदृढ बनाउका लागि आफू कटिबद्ध भएर लाग्ने उनको भनाइ छ।
'मेरो पहिलो निर्णय नै नागरिक उड्डयन प्राधिकरणको संस्थागत सुधारका लागि भएको छ। त्यो कामलाई हामी जतिसक्दो छिटो गर्छौ।त्यस्तै सेफ्टीका लागि नीतिगत तहबाट गर्नुपर्ने काम भए द्रुत मार्गबाट अघि बढाइने छ' उनले भने।
नेपालमा हालसम्म रेकर्डमा भएका ४९ वटा डबल इन्जिन जहाज दुर्घना भएका छन्। ८ सिंगल इन्जिन जहाज दुर्घटनामा परेका छन्।३६ वटा हेलिकप्टर दुर्घटनामा परेका छन्। त्यस्तै विदेशमा दर्ता भउका ९ जहाज दुर्घटना भएका छन्।