संस्कृति पर्यटन तथा नागरिक उड्डयन मन्त्री योगेश भट्टराईले युरोपियन युनियनको सेफ्टी लिस्टबाट मुक्त हुन अन्तर्राष्ट्रिय नागरिक उड्डयन संस्था(आइकाओ) को सहयोग मागेका छन्। आइकाओको ४० औ महासभालाई सम्बोधन गर्दै मन्त्री भट्टराईले नेपालमा पछिल्लो समय हवाई सुरक्षा सुदृढ हुँदै गएको र युरोपियन युनियनको सेफ्टी लिस्टबाट मुक्ता हुनका लागि आइकाओको संस्थागत सहयोग आवस्यक भएको बताए।
महासभालाई सम्बोधन गर्दै उनले यसका लागि नेपाल सरकार आफैले पनि युरोपियन एयर सेफ्टी अर्गनाइजेसनसँग मिलेर काम गरिरहेको र यसमा आइकाओजस्ता संस्थाको सहयोग पनि आवस्यक भएको बताए।
भौगलिक जटिलता र अस्थिर मौसमका बाबजुद सेफ्टी परिपालनामा गरिएको सुधार कारण पछिल्लो समय दुर्घटना दरमा कमी आएकाले उनले बताए।
नेपाल सरकारले पछिल्लो समय हवाई सेफ्टीसँगै पूर्वाधार निर्माण र हवाई सञ्जाल विस्तारलाई प्राथिमकता दिएको उनको भनाइ थियो। २० लाख पर्यटक भित्र्याउने लक्ष्यका साथ सरकारले भिजिट नेपाल २०२० अभियान चलाएको र यसका लागि हवाई सम्पर्क र सुरक्षा अनिवार्य शर्त भएकोमा नेपाल सरकार प्रष्ट भएको उनको भनाइ थियो।
आइकाओको ४० औं महासभा क्यानडाको मन्ट्रियलमा चलिरहेको छ । १९३ देशका प्रतिनिधिहरु र एक हजार भन्दा बढी संघ संस्थाहरुको सहभागितामा सेप्टेम्बर २४ देखि शुरु भएको महासभा अक्टोबर ४ सम्म चल्ने छ । ४० औ महासभामा नेपालका तर्फवाट संस्कृती, पर्यटन तथा नागरिक उड्डयन मन्त्री योगेश भट्टराई, क्यानडाका लागी नेपाली राजदुत भृगु ढुंगाना, मन्त्रालयका सह–सचिव शुरेस आचार्य, नेपाल नागरिक उड्डयन प्राधिकरणका महानिर्देशक राजन पोखरेल लगायतको प्रतिनिधि मण्डल सहभागी छ।