ललितपुरको गोदावरीमा ३ हजार सिट क्षमताको सभाहल बन्ने भएको छ।
उपत्यकामा ठूलो हलको अभाव भइरहेको बेला सहरी विकास तथा भवन निर्माण विभागले उक्त हल बनाउन लागेको हो।
५ महिनामै बनाइसक्ने योजना रहेको यो सभाहल हालसम्मकै नेपालको सबभन्दा ठूलो हल बन्नेछ।
सभाहल निर्माण आयोजनाका प्रमुख प्रकृण तुलाधर काठमाडौंमा ठूलो कार्यक्रमको आयोजना गर्न मिल्ने ठाउँ नभएकोले नयाँ हल निर्माणमा जुटेको बताए ।
‘अहिलेको अन्तर्राष्ट्रिय सम्मेलन केन्द्रमा संसद भवन छ, त्यसको वैकल्पिक अर्को हलको अभाव थियो’ तुलाधरले भने, ‘हामीले नयाँ बनाउँदा त्यो भन्दा ठूलो क्षमताको चाहिन्छ भन्ने लागेर यो सभाहल बनाउने निर्णय गरिएको हो।’
अन्तर्राष्ट्रिय सम्मेलन केन्द्र भनिएको नयाँ बानेश्वरको संसद भवनको सिट क्षमता ८ सय छ। यो बाहेक अर्को हल राष्ट्रिय सभाहल हो। यसको पनि सिट क्षमता जम्मा ५ सय छ।
हलको अभाव हुँदा सरकारले ठूला सम्मेलनहरू होटलको हल भाडामा लिएर गर्दै आएको थियो। पछिल्लो समय विमस्टेक तथा लगानी सम्मेलन जस्ता अन्तर्राष्ट्रिय सम्मेलन सोल्टी होटलमा गरेको थियो।
अब यो भवन बनेपछि भने ठूलो हलको अभाव टर्ने देखिएको छ।
‘ठूलो हलको अभाव भएकै हो,’ आयोजना प्रमुख तुलाधरले भने, ‘त्यसैले जग्गा खोज्दै हामी पहिले भक्तपुर पुगेका थियौं, त्यहाँ नेपाल राष्ट्र बैंकले जग्गा नदिएपछि गोदावरीमा रहेको सरकारी जग्गामा बनाउने निर्णय भएको हो।’
१ सय १२ रोपनीमा बन्न लागेको उक्त सभाहलको क्षेत्रफल ४५ मिटर चौडाइ र १ सय ६ मिटर लामो हुनेछ। गोदावरीको बसपार्कसँगै जोडिएको जग्गामा यो हल बन्न लागेको हो। यो सातदोबाटोदेखि ८ किलोमिटर टाढा पर्छ।
‘यो थिएटर जस्ता पुरै स्लोपको हुँदैन, अगाडिका केही भाग सम्मो र पछाडि केही भाग मात्रै स्लोप हुन्छ,’ तुलाधरले भने।
भवन एक तल्लाको हुनेछ। मूल भवनको दुवैतिर साना साना दुई कोठा पनि हुनेछन्। हलको दुई भागका साना कोठा मल्टिपर्पोज हल हुन्। हलको अघि रहेको मञ्चको दुवैतर्फ एलइडी स्क्रिन हुन्छ।
मुख्य हलको पछाडि पनि केही कोठाहरू हुनेछन्।
‘भिआइपीहरू सिधै मञ्चमा आउनुपूर्व बस्नका लागि हलको पछाडि होल्डिङ रूम बनाइने छ,’ आयोजना प्रमुख तुलाधरले भने।
सभाहल निर्माणको लागत ७२ करोड अनुमान गरिएको भएपनि बोलपत्रका आधारमा मूल्य निर्धारण हुने उनले बताए । टेन्डर भइसकेको यसका लागि असोज १३ गतेभित्र आवेदन दिइसक्ने मिति रहेको छ।
तुलाधरले चाडपर्व लागेकाले दशै तिहारको बिचमा ठेक्का सम्झौता हुने र नयाँ वर्ष सम्ममा निमार्ण सक्ने योजना रहेको बताए ।
५ हजार क्षमताको अन्तर्राष्ट्रिय सम्मेलन हलको अध्यायन हुदै
शहरी विकास तथा भवन निमार्ण विभागले ५ हजार सिट क्षमताको हल बनाउने प्रकृया पनि थालेको छ । ‘हामी ३ हजार क्षमताको गोदावारीको हलसँगै ५ हजार सिट क्षमताको ठुलो हल बनाउने तयारीमा छौं,’तुलाधरले भने ।
उनका अनुसार ५ हजार सिट क्षमताको हल अन्तर्राष्ट्रिय स्तरको हुनेछ । भक्तपुर जिल्लामा बनाउने गरि यसको अध्यायन तथा डिजाइ भइरहेको उनले बताए । यो हल निमार्ण पछि भने नेपालमा कुनै पनि कार्यक्रमको लागि हलको अभाव हुनेछैन ।