पछिल्लो केही महिनादेखि नेपाली बजारमा प्याजको मूल्य आकाशिएको छ। प्राय ३० देखि ४० रुपैयाँ प्रतिकेजी पर्ने प्याज कात्तिक र मंसिर अफ सिजन भएकाले केही महंगो हुन्छ। तर, यो वर्ष प्रतिकेजी १ सय ६० भन्दा बढी परेको छ।
सबभन्दा धेरै प्याज आयात हुने भारतमै मूल्य बढेकाले त्यसको असर नेपाली बजारमा परेको हो। अहिले भारतमा औषतमा ७० भारतीय रुपैयाँको आसपासमा प्रतिकेजी प्याज पाइन्छ।
पछिल्लो समय बंगलादेशमा पनि प्याजको मूल्य आकाशिएको छ।
प्याज महँगो भएपछि बंगलादेशी प्रधानमन्त्री शेख हसिनाले प्याज नै नखाने बताएकी थिइन्। भारतमा बढेको असर बंगलादेशमा पुगेको हो। बंगलादेशले ४० प्रतिशत प्याज विदेशबाट आयात गर्छ।
प्याजको भाउ अत्यधिक भएपछि भारत सरकारले भने प्याज आयात गर्ने तयारी गरेको छ। भारतीय सञ्चार माध्यमहरू सरकारी कर्मचारीलाई उद्धत गर्दै प्याज आयात गर्ने तयारी गरिरहेको बताएका छन्। तर, कहाँबाट आयात गर्ने भन्ने पुष्टि गरेका छैनन्।
भारतमा यस वर्ष प्याज खन्ने हुने सिजनमा पानी परेपछि प्याजको उत्पादनमा कमी आएको हो। बजारको चर्को मागका कारणले अहिले प्याजको मूल्य अस्वभाविक रूपमा बढेको छ।