कोभिड – १९ (कोरोना भाईरस) संक्रमण फैलन नदिन महानगरीय ट्राफिक प्रहरी महाशाखाले मादक पदार्थ सेवन, लेन अनुशासन उल्लङ्घन गर्ने तथा सवारी दुर्घटना गरी सवारी चलाउने चालक उपर दिदैं आएको सचेतना कक्षा हाललाई स्थगित गरेको छ।
ट्राफिक प्रहरीको कारवाहीमा परेका कागजपत्रहरु नियमानुसारको जरिवाना तिरेर लान सकिने र सचेतना कक्षा पछि लिइने व्यवस्था मिलाइएको महाशाखा प्रमुख भिम प्रसाद ढकालले जानकारी दिए।
ट्राफिक महाशाखाले दैनिक रूपमा हुदैँ आएको मापसे लगायत अन्य चेकिङहरू अति आवश्यक अवस्थाबाहेक अन्य अवस्थामा नगर्ने तर चेकिङ गर्नुपर्ने अवस्थामा सावधानीपूर्वक चेकिङ गर्ने व्यवस्था मिलाइएको ढकालले बताए। ‘यदी शंका लागेको खण्डमा मेडिकल चेक गराइ परिवारको जिम्मा लगाइन्छ’ उनले भने।
यस परिस्थितिमा सम्पूर्ण सवारी चालकहरूलाई मापसे लगायत अन्य ट्राफिक नियम उल्लङ्घन गरी सवारी नचलाईदिन महाशाखाले अनुरोध गरेको छ।
सवारी साधनहरुमा हुने भिडभाड कम गराउने प्लेकार्ड
महाशाखाले उपत्यकाका मुख्य–मुख्य बसपार्क एवम् भीडभाड हुने स्थानहरूमा नागरिकलाई सचेतना जगाउने तथा सवारी साधनहरुमा हुने भिडभाड कम गराउने गरी प्लेकार्ड सहितको ट्राफिक प्रहरी टोली आजदेखि खटाएको छ।
‘यस विशेष टोलीले सीट क्षमताअनुसार मात्र यात्रु राख्न, यात्रुहरूलाई कोचिएर यात्रा नगर्न, सधैँ मास्क लगाएर यात्रा गर्न, भिडभाड गरी नबस्न विशेष अनुरोध गर्नेछन’ ढकालले भने।
महाशाखा तथा मातहतका ट्राफिक कार्यालयहरूबट उपत्यकाको ८६ स्थानमा २०० भन्दा बढी ट्राफिक प्रहरीहरू परिचालन गरिएको महाशाखाले जनाएको छ।
त्यस्तै सार्वजनिक सवारी साधन स्यानिटाइजर छर्केर मात्रै सञ्चालन गरे/नगरेको तथा सिट क्षमताभन्दा बढी यात्रु राखे/नराखेको अनुगमन तीव्र पारेको महाशाखाले बताएको छ।
