ग्यास आपूर्ति बढेपनि दिनप्रतिदिन ग्यास नपाएको उपभोक्ताको गुनासो बढेपछि आयल निगम र एलपी ग्यास उद्योग संघको संयुक्त सहकार्यमा आइतबार(आज)देखि विशेष डिलरहरूबाट ग्यास ब्रिक्री भइरहेकाे छ।
उक्त बिक्री केन्द्रमा ग्यास लिने उपभोक्ताको चाप देखिएको एलपी ग्यास उद्योग संघका अध्यक्ष गोकुल भण्डारीले बताए।
‘आजबाट डिपो थप गरेर ग्यास दिएका छौं, उपभोक्ताको चाप नै देखिन्छ’ उनले भने।
बिक्री केन्द्रमा ग्यासको वितरण कसरी भएको छ भनेर हेर्न नेपाल आयल निगम र ग्यास उद्योगले अनुगमन समेत गरिरहेको उनले जानकारी दिए।
‘कुनै कम्पनीमा लाइन छ कुनैमा छैन, अनुगमनमा गएका निगमका निर्देशक शुशिल भट्राईले भने, ‘तर त्यस्तै अनियन्त्रित भीड भने देखिएको छैन। उपभोक्ताले लाइन लागेर ग्यास लिइरहेका छन्।’
राजधानी क्षेत्रका स्टोरहरूमा भने उपभोक्ताको बढी भीड देखिएको छ। त्यसमा पनि नेपाल ग्यासमा भने उपभोक्ताको भीड नै देखिएको व्यवसायीहरू बताउँछन्।
बालाजुमा रहेको बीएमसी कर्नरमा बिहानको समयमा भने उपभोक्ताको भीड देखिएको सञ्चालक सुरेन्द्र श्रेष्ठले बताए।
‘बिहानको समयमा त भीड नै थियो, करिब एक/डेढ सय मानिस लाइनमा थिए। अहिले त सामान्य अवस्थामा आइसक्यो’ उनले भने।
हालसम्म भने ४ सय ८० वटा ग्यास बिक्री भएको उनले जानकारी दिए।
थलीमा रहेको आदर्श स्टोरमा भने ग्यास लिने उपभोक्ताको खासै भीड नभएको स्टोरका सञ्चालक आनन्द सिंखडाले जानकारी दिए। उक्त स्टोरमा ओम ग्यास पाइन्छ।
उनका अनुसार सामान्य दिनमा जस्तै ग्यास बिक्री भयो। ग्रामीण क्षेत्र भएकाले पनि खासै भीड नभएको उनी बताउँछन्।
‘यो गाउँ क्षेत्र नै पर्छ, मानिसले पहिल्यै जोहो गरिसकेका पनि हुन सक्छन्,’ उनले भने।
‘आज पहिलो दिन भएकाले मानिसले थाहा नपाएका पनि हुन सक्छन् भोली आउन पनि सक्छन्’, उनले थपे।
उनका अनुसार कम्पनी ८० वटा ग्यास पठाएकोमा ३० वटा बिक्री भएको छ।
आयल निगमका अनुसार अहिलेसम्म अनामनगरबाट नेपाल ग्यास २ सय ४० सिलिण्डर बिक्री भएको छ। ४७ वटा सिलिण्डर लाइनमा छ भने ८० वटा सिलिण्डर आउने क्रममा छ।
त्यस्तै, सिफल स्थित सुगम एण्ड एभरेष्ट ट्रेडमा सुगम ६३ वटा र एभरेष्ट १ सय ३४ वटा बिक्री भएको छ। सुगम र एभरेष्टको ५०–५० वटा सिलिण्डर अझै स्टक छ।
पेप्सिकोलाबाट सगर ग्यास ३ सय ७९ बिक्री भइसकेको छ भने ७० वटा स्टक रहेको छ।
एसटिसी ३ सय सिलिण्डर बिक्री भएको छ। २५ सय सिलिण्डर स्टकमा रहेको छ।
काठमाडौं, भक्तपुर र ललितपुरमा २२ वटा उद्योगले विशेष डिलरबाट ग्यास बिक्री सुरू गरेका छन्।
ती डिलर बिहान १० देखि बेलुका ५ बजेसम्म खुला हुनेछन्।
