विश्व कोरोना भाइरसको सामना गरिरहेको छ। धेरै देश लकडाउनमा छन्। दुईसाताभन्दा बढी समय भयो नेपालमा पनि लकडाउन भएको। यसले नेपाली जनजीवन प्रभावित बनाएको छ।
योसँगै खाद्य सामग्री आपूर्तिमा समस्या पनि हुँदै गएको छ। भारतलगायत विभिन्न मुलुकबाट खाद्य वस्तु निर्यात भएपनि लेबर तथा गाडीको समस्याले डिष्ट्रिब्युट गर्न असहज भएको छ।
कोरोनाका डरले होलसेल पसल नखुलेको खुद्रा व्यवसायीहरूले बताउँदै आएका छन्।
लकडाउनका बेला साना किराना व्यवसायीले भोगिरहेका यो समस्या ‘रासन टेकले’ समाधान गर्ने भएको छ। रानस टेक प्राइभेट लिमिटेड किराना पसलमा खाद्यान्न डेलिभरी गर्ने कम्पनी हो। यसले होलसेल मूल्यमा खाद्य सामाग्री डेलिभरी गर्छ।
सामाजिक सञ्जाल फेसबुक, एप वा कम्पनीको वेबसाइटमार्फत् किराना व्यवसायीले घरै बसेर चाहिएका खाद्य सामग्री अर्डर गर्न सक्नेछन्।
एक महिनादेखि कम्पनीले किराना पसलमा चाहिएको खाद्य सामाग्री डेलिभरी गर्न थालेको कम्पनीका सञ्चालक नितेश श्रेष्ठले बताए।
उनका अनुसार यो कम्पनीले विशेष रूपमा महिलालाई प्राथमिकता दिइएको छ।
‘एकल महिलाले साना साना पसल खोलेर बसेका हुन्छन्। सामान सकियो भने भन्ने बित्तिक्कै लिन जान सक्दैनन्,’ उनले आफ्नो कम्पनीको उद्देश्य दर्शाउँदै भने, ‘सामान लिन जानुपर्र्दा बालबच्चा छोडेर जानुपर्छ, पसल बन्द गर्नुपर्छ। त्यो वर्गलाई लक्षित गरेर व्यवसाय सुरू गरेका हौं।’
यो कम्पनीे युनपार्कको अपोजिट साइडमा छ। यसमा ५ जनाले १ करोड रूपैयाँ लगानी गरेका छन्। त्यसमध्ये तीन जना फिल्डमै खटिएका छन्। उनीहरूले ६ जना कामदार पनि राखेका छन्।
कम्पनीले ललितपुर, भक्तपुर र काठमाडौंमा सेवा दिइरहेको उनले बताए।
‘व्यवसायीले सामान अर्डर गर्न रासन डट कम डट एनपी र रासन अनलाईन भनेर गुगनमा खोजे भने गुगलमा सजिलै भेट्छन्, ‘उलने कम्पनीको सेवाबारे बताउँदै भने, ‘ग्राहकले ५ हजारभन्दा माथिको सामान अर्डर गर्नुपर्छ, डेलिभरी शुल्क लाग्दैन।’
कम्पनीले विहान ८ बजेदेखि बेलुका ७ बजेसम्म सेवा दिइरहेको छ। सामानको फिक्स मूल्य छ। लागतमा २५ देखि ५० रूपैयाँ रोखेर सामान डेलिभरी गर्ने गरेको उनले बताए।
लकडाउनले व्यवसायमा धेरै असर पारेको उनी बताउँछन्।
‘हामीले जतिसामान राख्छौं भन्ने सोचेका थियौं त्यो राख्न सकिएन। अहिले व्यवसायीले धेरै नै महंगो भन्छन्,’ उनले भने।
उनी ७ वर्ष युएई बसेर भर्खर २ महिना अघि मात्र नेपाल आएका हुन्। उनका साथीहरू पनि प्राय सबै विदेशबाटै आएका छन्। नेपालमै केही नयाँ काम गरौं भन्ने उद्देश्यले नेपाल आएको उनी बताउँछन्।
अहिले कम्पनीले खाद्यान्नमा मात्र डेलिभरी गर्दै आएको छ। पछि तरकारी पनि राख्ने उनको योजना छ।
‘अहिले लकडाउनले बैंक बन्द छन्, पछि लगानी पनि थप्छौं, लगानीकर्ता पनि बढाउँछौं र सेवा पनि विस्तार गछौं,’ उनले भने।
