मुख्य राजनीतिक दलहरूले निर्वाचन आयोगसँग पाँच बुँदे प्रतिबद्धता गरेका छन्। निर्वाचन आयोगले बुधबार बोलाएको छलफलमा सहभागी दलहरूले पाँच बुँदे प्रतिबद्धता पत्रमा हस्ताक्षर गरेका हुन्। दलहरूले हस्ताक्षर गरेको प्रतिबद्धतापत्रमा शान्त र सु-व्यवस्थित वातावरणमा निर्वाचन गराउन दलहरू प्रतिबद्ध रहेको कुरामा जोड दिइएको निर्वाचन आयोगले जनाएको छ।
उनीहरूले आफ्ना कार्यकर्तालाई चुनाव प्रचारप्रसार गर्दा संयमित हुन निर्देशन दिने प्रतिबद्धता निर्वाचन आयोग सामू व्यक्त गरेका हुन्।
निर्वाचनको मिति नजिकिँदै जाँदा दलका कार्यकर्ताहरू हिंसात्मक झडपमा उत्रिन थालेपछि प्रमुख आयुक्त अयोधिप्रसाद यादवले दलका शीर्ष नेतालाई नै छलफलमा डाकेका थिए।
खासगरी दोलखामा माओवादी र एमाले कार्यकर्ताबीच भएको झडपमा एमाले कार्यकर्ताको मृत्यु भएपछि निर्वाचन आयोगले अझ संवेदनशील हुँदै दलहरूको ध्यानाकृष्ट गरेको हो।
बैठकमा प्रमुख आयुक्त यादवले पछिल्लो समय भएका झडप तथा आगजनीको फेहरिस्त नै प्रस्तुत गरेका थिए। उनले आफ्ना कार्यकर्तालाई संयमित राख्न र हिंसात्मक गतिविधि बन्द गर्न शीर्ष नेताहरूलाई भनेका थिए।
छलफलमा सहभागी एमाले नेता सुवास नेम्वाङले दोलखा घटनाको विषयमा प्रधानमन्त्री दाहालसँग जिज्ञासा राखेका थिए। नयाँ शक्तिका संयोजक बाबुराम भट्टराईले गोरखामा भएको झडपको कुरा उठाएका थिए।
छलफल पछि दलहरू पाँच बुँदे प्रतिबद्धताका लागि तयार भएको निर्वाचन आयोगले जानकारी दिएको छ।
छलफलमा प्रधानमन्त्री पुष्पकमल दाहाल, कांग्रेस सभापति शेरबहादुर देउवा, एमाले संसदीय दलका उपनेता नेम्वाङ, नयाँ शक्तिका संयोजक भट्टराई लगायतका नेताहरू सहभागी थिए।
प्रधानमन्त्री दाहालले निर्वाचन आयोगले गरेको तयारीप्रति सन्तुष्टी जनाउँदै आयोगलाई धन्यवाद दिए। साथै हिंसात्मक घटना हुन नदिन आफू प्रतिबद्ध रहेको दोहोर्याए।
'जसरी दिनरात नभनी खटेर आयोगले निर्वाचनको तयारी गरेको छ, त्यसका लागि तपाईंहरूलाई धन्यवाद दिनै पर्छ,' उनले भने,'जहाँसम्म हिंसात्मक घटनाहरूको कुरा छ, त्यस्ता घटना हुन नदिन म पूर्ण रूपमा प्रतिबद्ध छु। नेपाल सरकार प्रतिबद्ध छ।'
