नेकपा एमाले अध्यक्ष केपी शर्मा ओलीले कांग्रेस र माओवादी केन्द्र मिलेर एमालेलाई अनाहमै मधेसविरोधीका रुपमा दुष्प्रचार गरिएको बताएका छन्।
रुपनी घटनामा प्रहरीले चलाएको गोली लागेर मधेसी जनता मारिएको प्रसंग उल्लेख गर्दै ओली भने, 'विरोध गर्ने मधेस मोर्चा, गोली हान्ने सरकार, आरोप खाने एमाले अनि चोख्खै बस्ने सरकार।'
मधेसी जनताप्रतिको विभेद बरु कांग्रेसभित्रै बढी भएको उनले बताए। 'कांग्रेसभित्र विभेद भएकैले थुप्रै नेता तथा कार्यकर्ताले पार्टी छाडे तर एमालेमा त्यस्तो छैन,' उनले भने।
मधेससँग सम्झौता गर्ने र पालना नगर्ने पनि कांग्रेस नै भएको उनले बताए। यति मात्र होइन, हालै सरकारले दिएका मान, पदवी र विभूषणमा पनि मधेसमाथि विभेद गरिएको उनले आरोप लगाए। ५१४ मानपदवी दिइएकोमा मधेसका ५४ जनाले मात्र पाएको बताउँदै उनले भने, 'त्यो पनि पोखरीमा माछालाई चारो हालेजस्तै हुलमुलमा पारेर दिइएको छ। अझै तपाईंहरू नै एमालेलाई मधेस विरोधी भन्नुहुन्छ?'
भरतपुरको निर्वाचनमा मतपत्र च्यातिएको प्रसंग पनि उनले उठाए।
'भारत र श्रीलंकाको क्रिकेटमा श्रीलंकाले २५२ रनको टार्गेट दिएको थियो तर भारतले २०० रन बनाएपछि समर्थकले खेल हुनै दिएनन् अनि श्रीलंकालाई विजेता घोषणा गरियो,' भरतपुरको मतगणनालाई क्रिकेटको स्कोरसँग दाँज्दै ओलीले कटाक्ष गरे, 'भरतपुर मतगणनामा पनि त्यस्तै भयो।'
प्रधानन्यायाधीशलाई महाअभियोग लगाउने, प्रहरीलाई मुन्ट्याउने धम्कयाउने, निर्वाचन अायोगलाई अाफूअनुकूल चलाउने काम भएको उनले बताए। निर्वाचन अायाेगसमेत स्वतन्त्र हुन नसकेको उनले उल्लेख गरे। यसविपरित एमालेले देशप्रति जिम्मेवार र गम्भीर भएर संसद सञ्चालन गर्न दिएको उनले उल्लेख गरे।
'लाेकमानको महाअभियोगका पक्षमा कांग्रेस बोल्न सकेन, तर प्रधान्यायाधीश सुशीला कार्कीलाई महाअभियोग लगउन कांग्रेस तयार भयो,' अाेलीले भने।