प्रमुख प्रतिपक्षी दल नेकपा एमालेका उपाध्यक्ष भीम बहादुर रावलले संसदमा विचाराधिन संविधान संशोधन प्रस्तावलाई फिर्ता लिएर आफ्नो पार्टीका कुराहरु समेटेर र राजपासँग सहमति कायम गरेर नयाँ प्रस्ताव ल्याइए त्यसलाई पास गराउन एमालेले सहयोग गर्ने स्पष्ट पारेका छन् ।
बिहीवार राजधानीमा आयोजित एक कार्यक्रममा बोल्दै उपाध्यक्ष रावलले अहिले संसदमा विचाराधिन रहेको संविधान संशोधन प्रस्ताव राष्ट्र र जनताको हितमा नभएकोले त्यसलाई फिर्ता लिई नयाँ सहमतिका आधारमा नयाँ प्रस्ताव ल्याइए आफूहरुले त्यसलाई पास गराउन पूर्ण रुपमा सहयोग गर्ने बताएका हुन् । ‘हामी संशोधनको विरोधमा छैनौं, संशोधन गर्न सकिन्छ, तर देश र जनताको हितमा हुनुपर्छ ।’ उनले भने ‘संसदमा दर्ता गरिएको संशोधन प्रस्तावबारे अहिलेसम्म कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डले जवाफ समेत दिएका छैनन् ।’
कार्यक्रममा बोल्दै उनले प्रस्तावमा उल्लेख भएको सीमाङ्कनसम्बन्धी विवाद आयोगमार्फत् टुङ्गो लगाउने कुराले प्रदेशको अधिकारलाई कटौती गरेकोले यसमा पनि आफ्नो पार्टीको विरोध रहेको बताए । त्यस्तै, सरकारले स्थानीय तहका प्रमुख र उपप्रमुखले राष्ट्रिय सभामा मतदान गर्न नपाउने प्रस्ताव ल्याएकोले यसलाई आफूहरुले कुनैपनि हालतमा नमान्ने अडान कायमै रहेको उनले बताए । उनले सत्तारुढ दल कांग्रेस र नेकपा माओवादी केन्द्रले संविधान र कानूनको मर्मविपरीत स्थानीय तहको अधिकार कटौती हुनेगरी प्रस्ताव आएकोप्रति आफूहरुको पहिल्यै नै विरोध रहेकोले एमालेको अडान यथावत रहेको बताए ।
त्यस्तै, उनले नागरिकताको सवालमा अहिलेको संशोधन प्रस्तावमा उल्लेख गरिएको विषय पनि आपत्तिजनक नै रहेकोले यसलाई आफूहरुले ठाडै अस्वीकार गरिदिएको बताए । उनले गाउँ/गाउँमा सिंहदरबार भनेर नारा दिनेहरुले नै स्थानीय तहका प्रमुख र उप–प्रमुखले राष्ट्रिय सभामा मतदान गर्न नपाउने प्रस्ताव ल्याएको आरोप लगाए । यद्यपी उनले प्रदेश नम्बर २ को निर्वाचन सम्पन्न भएपछि खुला हृदयले संविधान संशोधनबारे छलफल गर्न आफ्नो पार्टी तयार रहेको समेत स्पष्ट पारे । उनले थपे,‘यदि जनसंख्याको अनुपात मिलेको छैन भने पनि हामी त्यसबारेमा सोच्न सक्छौं, तर २ नम्बर प्रदेशमा मात्रै होइन, सबैतिर हेर्नुपर्छ।’
उनले चुनावमा भाग लिने वा नलिने ? के गर्ने भन्नेबारे छलफल गर्न राजपा नेपालका नेताहरु दूतावास जाने गरेको भन्दै यो अन्तरराष्ट्रिय कानून र भियाना कन्भेन्सनको विपरित रहेको समेत आरोप लगाए । रावलले भने,‘सप्तरीमा जनता डुबेका छन्, त्यसबारेमा एक शब्द पनि नबोल्ने ? अनि दूतावासमा धाएर बस्ने ?’ उनले तराई मधेशका जनताले चुनाव चाहेको बताउँदै जनताको मत हाल्ने अधिकारलाई बञ्चित नगर्न समेत राजपालाई आग्रह गरे । ‘आफूहरू संसदमा प्रधानमन्त्री चयन गर्न मतदान गर्न जाने, अनि जनतालाई आफ्नो मत हाल्नबाट बञ्चित गर्ने, यो कस्तो राजनीति हो ?’ उनले थपे ।
२ नम्बर प्रदेशको चुनावमा राजपाले भाग नलिएपनि चुनाव हुने रावलको भनाइ थियो । उनले भने,‘स्थानीय तहको चुनाव लगभग सम्पन्न भैसक्यो, ६ वटा प्रदेशमा निर्वाचन भैसक्यो, अब पर्सादेखि सप्तरीसम्म २ नम्बर प्रदेशमा बाँकी हो, त्यो पनि हुन्छ।’ रावलले राजपासँग वार्ता गर्न आफ्नो पार्टी सँधै सकारात्मक रहेको बताउँदै आफूहरु वार्ताको पक्षमा रहेको बताए ।