नख्खुबाट तीन महिनाअघि सुरू भएको बिस्फोट श्रृंखला

विप्लवको ‘क्रान्ति’ मा सरकारको प्रतिबन्ध : तीन महिनामा गयो पाँच नेपालीको ज्यान

सेतोपाटी संवाददाता

काठमाडौं, जेठ १२

आइतबार दिउँसो राजधानीको सुकेधारा र घट्टेकुलोमा लगालग दुई विस्फोट भए। लगभग एकै समयमा उस्तै प्रकृतिका विस्फोटले ती क्षेत्रका स्थानीय त्रसित छन्।

सुरूमा सिलिण्डर ग्यास पड्किएको भनिए पनि प्रहरीको प्रारम्भिक अध्ययनबाट बम बनाउँदाबनाउँदै वा अन्त सार्न लाग्दा विस्फोट भएको देखिएको छ।

‘दुबै घटनामा विप्लव समूहका कार्यकर्ताको संलग्नता देखिन्छ,’ उनले भने, ‘थप अनुसन्धान भइराखेको छ। घटनास्थलको चेकजाँच र घटनास्थलमा मुचुल्का उठाउने काम भइराखेको छ।’

दुई विस्फोटमा मारिने २ जनाको सनाखत भएको छ। तीमध्ये १ जना नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका प्रज्वल शाही छन्।

उनी विप्लव निकट कार्यकर्ता रहेको प्रहरीले जनाएको छ। उक्त घटनामा घाइते भएका रविन केसी उक्त पार्टीका विद्यार्थी संगठनका त्रिचन्द्र कलेजका इकाइ अध्यक्ष हुन्। सुकेधारा विस्फोटमा मृत्यु भएका जीवकुमार ठाकुर शैलुन सञ्चालक हुन्। उनकै शैलुनमा विस्फोट भएको हो। ५९ वर्षीय ठाकुर विप्लव समूहसँग सम्बन्धित थिए की थिएनन् भन्ने प्रहरीले अनुसन्धान गरिरहेको छ।

सुकेधाराको विस्फोटमा थप एक जनाको पनि मृत्यु भएको छ। उनी को हुन् भन्ने खुलिसकेको छैन।

आइतबार साँझ ललितपुरमा पनि बम भेटिएका छन्। सोमबार नेपाल बन्द आयोजना गरेको विप्लव समूहले अघिल्लो रात आममानिसमा त्रास फैलाउन बमहरू राखेको देखिन्छ।

१३ वर्षअघि २०६३ मंसिर ५ गते तत्कालीन नेकपा माओवादी र नेपाल सरकारबीच शान्ति सम्झौतामा हस्ताक्षर भएपछि यो तहमा हिंसाको त्रास फैलिएको पहिलो पटक हो। तत्कालीन माओवादीबाट चोइटिएर बनेको विप्लव समूहले पछिल्लो समय हिंसात्मक गतिविधि बढाइरहेको छ।

पुष्पकमल दाहाल नेतृत्वको तत्कालीन माओवादीले क्रान्तिलाई गद्दारी गरेको भन्दै क्रान्तिको कार्यभार पूरा गर्न क्रान्ति गर्नु परेको विप्लवको तर्क छ।

र त्यो क्रान्तिको त्यो ‘कार्यभार’ पूरा गर्न उनले हिंसाको सहारा लिएका छन्।

भौतिक संरचनामा क्षति पुर्‍याउने र चन्दा असुल्ने विप्लव समूहले फागुन १० गते ललितपुरको नख्खुस्थित एनसेल कार्यालयअघि विस्फोट गरायो। उक्त विस्फोटमा परी लमजुङका सिंहप्रसाद गुरूङको मृत्यु भयो।

फागुन २५ गते उक्त समूहले बसुन्धरास्थित वैदेशिक रोजगार व्यवसायी संघका अध्यक्ष रोहन गुरूङको घरमा बिस्फोट गरायो। उनको घरमा भएको उक्त विस्फोटमा पहिलो पटक सिलिण्डर बम प्रयोग गरिएको थियो।

त्यसको केही सातापछि फागुन ३० मा सरकारले विप्लव समूहका गतिविधिलाई प्रतिबन्ध लगायो। देशभरि अप्रेसन गर्‍यो।

जेठ ८ गते प्रहरीको गोली लागेर भोजपुरमा विप्लव समूहका कार्यकर्ता तीर्थराज घिमिरे घाइते भए। अर्को दिन उनको ज्यान गयो। राज्यबाट विप्लव समूहका कार्यकर्ताको ज्यान गएको यो पहिलो घटना हो।

त्यसपछि विज्ञप्ति जारी गर्दै विप्लवले घिमिरेको हत्या भएको भन्दै बदला लिने बताए। घटनाको विरोधमा जेठ १३ गते नेपाल बन्द आह्वान गरे।

बन्दको अघिल्लो दिन बम बनाउँदा बनाउँदै बम विस्फोट भए। मृतकमध्ये १ जना उनकै कार्यकर्ता भएको खुलेको छ भने घाइतेमध्ये दुई जना पनि सोही समूहका छन्।

सम्बन्धित समाचारहरू :

सुकेधारा र घट्टेकुलोमा बिस्फोट, तीन जनाको मृत्यु

घट्टेकुलो बम बिस्फोटमा घाइते हुने विप्लवका विद्यार्थी नेता

काठमाडौंमा बम बिस्फोट भएका दुबै घर नेपाली सेनाको नियन्त्रणमा

सुकेधारा विस्फोटमा मारिने महोत्तरीका जीवकुमार ठाकुर

सुकेधारा विस्फोटका प्रत्यक्षदर्शी भन्छन्- उद्धार गर्नेभन्दा सेल्फी खिच्ने धेरै थिए

घट्टेकुलो विस्फोटका तस्बिरहरू

विस्फोटपछि उपत्यकामा कडा सुरक्षा, नाकामा सादा पोशाकका प्रहरी

घट्टेकुलो बिस्फोटमा मारिने विप्लवनिकट प्रज्वल शाही

सुकेधारा बम विस्फोटस्थलमा जे देखियो(तस्बिरहरू)