नेत्रविक्रम चन्द ‘विप्लव’ कार्यकर्ताले छापामार शैलीमा प्रहरी चौकी आक्रमण प्रयास गरेपछि सोलुखुम्बुको एउटा प्रहरी चौकी खाली गराइएको छ। महाकुलुङ गाउँपालिका–३ छेस्कामा प्रहरी चौकीमा आक्रमण प्रयास भएपछि प्रहरीलाई सुरक्षित स्थान सारिएको छ।
जिल्ला प्रहरी कार्यालय सोलुखुम्बुका प्रहरी निरीक्षक प्रदीप सुवेदीका अनुसार सुरक्षा दृष्टिले संवेदनशील देखिएपछि चौकी खाली गराइएको बताए। विप्लव कार्यकर्ताको ठूलो समूह आइतबार मध्यराति प्रहरी चौकीमा आक्रमण गर्न पुगेको थियो। तर, त्यसबेलासम्ममा त्यहाँका प्रहरीलाई सुरक्षित स्थान सारिसकिएको थियो। हातहतियार तथा प्रहरी नभएको चौकीमा पुगेर विप्लव कार्यकर्ता फर्केको प्रहरीले जनाएको छ।
प्रहरी सहायक निरीक्षक हिराप्रसाद देवकोटाको नेतृत्वमा छेस्कामा ६ जना प्रहरी कार्यरत थिए। विप्लव माओवादीको सम्भावित आक्रमण खतरापछि सबैलाई सुरक्षित स्थान लगिएको थियो। ‘त्यहाँका प्रहरीलाई सुरक्षित स्थानमा राखिएको छ, सुरक्षाको दृष्टिले माओवादीबाट खतरा रहेको पाइएपछि चौकी खाली गराइएको हो,’ सुवेदीले भने, ‘आक्रमण भएको छैैन।’
जिल्ला प्रहरी प्रमुख प्रहरी नायब उपरीक्षक शालिकराम शर्माको नेतृत्वको टोली छेस्का पुगिसकेको छ। छेस्का सदरमुकाम सल्लेरीबाट ७५ किलोमिटर टाढा छ।
चार दिनअघि पनि शर्मासहित २१ जनाको टोली सदरमुकामबाट छेस्का गएको थियो। प्रहरी चौकी भएको स्थानमा विद्युत र दुरसञ्चार सेवा अबरुद्ध छ।
सोलुखुम्बुकी सहायक प्रमुख जिल्ला अधिकारी लक्ष्मीकुमारी शाहीले छेस्कामा विप्लव माओवादीका कारण चौकी खाली गराइएको जानकारीमा नआएको बताइन्। ‘विप्लव माओवादीको गतिविधि भएको होला, तर आक्रमण प्रयास केही पनि भएको हैन,’ उनले भनिन्।
