नेपाल कम्युनिस्ट पार्टी(नेकपा)को सचिवालय बैठक सुरू हुँदैछ।
दिउँसो ३ बजे प्रधानमन्त्री निवास बालुवाटारमा सुरू हुने बैठकमा केन्द्रीय समितिको कार्यविभाजनका बारेमा छलफल हुँदैछ।
सकेसम्म केन्द्रीय समितिको कार्यविभाजन सक्ने गरी बैठक बस्न लागेको बालुवाटार स्रोतले बताएको छ। ४ सय ४१ सदस्यीय केन्द्रीय समिति गठन भएपछि गतवर्ष जेठ ३ र ९ गते बैठक बसेको थियो। त्यसपछि केन्द्रीय सदस्यहरू कामविहीन छन्।
यसअघि आजको सचिवालय बैठकमा विभिन्न विभागहरूको नेतृत्वबारे टुंगो लगाउने भनिएको थियो।
बिहान दुई अध्यक्ष, महासचिव विष्णु पौडेल र नेता माधवकुमार नेपालसहित बसेको बैठकमा संगठन, आर्थिक, प्रचार, पार्टी स्कुल लगायत विभागको नेतृत्व कसलाई दिने भन्ने विषयमा छलफल भयो। तर चार नेताहरूबीच भएको सो छलफल निष्कर्षमा भने पुग्न नसकेको स्रोतको भनाइ छ। आज बस्ने बैठकमा केन्द्रीय समितिको कार्यविभाजनबारेमात्रै छलफल गरेर निष्कर्ष निकाल्ने तयारी नेताहरूले गरेका छन्।
बिहान चार नेताहरूबीच भएको बैठकमा पोलिटब्यूरो गठनका विषयमा पनि छलफल भएको थियो। तर अध्यक्ष पुष्पकमल दाहालले पोलिटब्युरो गठनभन्दा पहिले केन्द्रीय सदस्यको कार्यविभाजन सक्नुपर्ने बताएपछि पोलिटब्युरो गठनको विषय छलफलमा प्रवेश गरे पनि अघि बढ्न भने सकेन ।
