राष्ट्रपति विद्यादेवी भण्डारीले समृद्ध नेपाल निर्माण गर्न लोक सेवा आयोगले महत्वपूर्ण भूमिका निर्वाह गर्ने बताएकी छन्।
आयोगको ६९ औं वार्षिकोत्सवको अवसरमा आइतबार काठमाडौंमा आयोजित कार्यक्रममा राष्ट्रपति भण्डारीले सरकारले लिएको संकल्पलाई पूरा गर्न आयोगले सार्वजनिक प्रशासनलाई स्वच्छ, सुदृढ र जवाफदेही बनाएर महत्वपूर्ण भूमिका निर्वाह गर्ने विश्वास व्यक्त गरिन्।
राष्ट्रपति भण्डारीले संविधानले सुम्पेको जिम्मेवारीलाई योग्यता, निष्पक्षता र स्वच्छताको आधारमा पूर्ण कार्यान्वयन गर्ने कामलाई पनि आयोगले सुदृढ ढंगले अघि बढाएको स्मरण गराएकी थिइन्।
लोक सेवा आयोगले परीक्षण पद्धतिलाई समय सापेक्ष बनाउने प्रयास गरिरहेको उनले बताइन्।
संवैधानिक अंगको रूपमा रहेको आयोगले सार्वजनिक प्रशासनलाई अझै स्वच्छ, सुदृढ र जवाफदेही बनाउन महत्वपूर्ण भूमिका खेल्ने उनको अपेक्षा छ।
उनले कर्मचारीहरूलाई राष्ट्रको आर्थिक तथा सामाजिक उन्नति तथा प्रगतिमा समर्पित भएर जुट्न आह्वान गरिन्।
राष्ट्रपति भण्डारीले आयोगको साख, गरिमा र यसप्रति रहेको जनविश्वासलाई झनै समुन्नत तुल्याउन सरकार र सम्वद्ध सबै क्षेत्रलाई आवश्यक सहयोग, समन्वय र सुझाव दिन आग्रह गरिन्।