भौतिक पूर्वाधार तथा यातायातमन्त्री रघुवीर महासेठले तत्काल मन्त्रिमण्डल पुनर्गठन नहुने स्पष्ट पारेका छन्।
बुधबार रिपोर्टर्स क्लब नेपालले आयोजना गरेको साक्षात्कारमा बोल्दै उनले मन्त्रिमण्डल पुनर्गठन गर्ने वा नगर्ने भन्ने अधिकार प्रधानमन्त्रीको हातमा रहेको सुनाए। उनले भने, ‘मन्त्रिमण्डल पुनर्गठन हुन्छ भनेर यो सरकार गठन भएदेखिनै हल्ला भएको हो। यसमा कुनै सत्यता छैन।’
पार्टीका अर्का अध्यक्ष पुष्पकमल दाहाल प्रचण्डले तत्काल मन्त्रिमण्डल हेरफेर हुन्छ भन्ने आशयले नबोलेको उनको दाबी छ। सरकार आलोपालो रुपमा चलाउनेबारे सहमति के हो ? भन्ने प्रश्नमा मन्त्री महासेठले अध्यक्ष द्वय ओली र प्रचण्डबीच यदी सहमति भए उक्त सहमति कार्यान्वयन हुनेमा आफू विश्वस्त रहेको बताए। सरकार सञ्चालनबारे पनि पार्टीभित्र सहमति नै रहेको उनको जिकिर छ।
महासेठले भने, ‘हाम्रो पार्टीभित्र कुनै पनि अन्तरविरोध छैन। मैले बुझेअनुसार केपी ओली नै अबको पाँच वर्ष प्रधानमन्त्री हो। तर, पार्टीले निर्णय गर्यो भने प्रधानमन्त्री, मन्त्री हामी सबै भोलि नै फर्किन्छौँ।’
सरकार गठन भएको १७ महिना व्यतित भएको र यो अवधिमा सरकार कुनै पनि मोर्चामा असफल नभएको पनि उनले दाबी गरे। सरकारको काम देखेर प्रमुख प्रतिपक्षी दल नेपाली कांग्रेस डराएको उनको आरोप छ।
उनले भने, ‘विकास र समृद्धि भनेको कुरा रातारात हुने होइन। अब बजेट कार्यान्वयनसँगै धमाधम विकासका काम अघि बढ्छन्।’ मन्त्री महासेठले सरकारले एक वर्षमा ईतिहासमै अरुले गर्न नसकेको काम गरेर ‘रेकर्ड’ कायम गरेको पनि दाबी गरे।
सरकारले एक वर्षमा एक हजार किलोमिटर सडक पिच गरेको, एक हजार पन्ध्र सय किलोमिटर ग्राभेल गरेको र पन्ध्र सय किलोमिटर नै नयाँ ट्रयाक खोलेको उनले बताए।
सरकार बनेको एक वर्षभित्रमा नै ७ प्रतिशतको आर्थिक वृद्धि भएको सुनाउँदै उनले अर्को आर्थिक वर्षभित्र ९ प्रतिशतको वृद्धिदर पुर्याउने घोषणा गरे। आगामी चार/पाँच वर्षभित्र दोहोरो अंकको आर्थिक वृद्धिदर हासिल गर्ने पनि उनले दाबी गरे।
सरकारले रेलमार्ग निर्माणको काम तिव्र गतिमा अघि बढाईरहेको सुनाए। उनकाअनुसार पुर्व–पश्चिम रेलमार्गको डिपिआर.को काम भैरहेको छ। आगामी दश वर्षभित्र २ हजार ८ सय किलोमिटर रेलमार्गले देशलाई जोड्ने मन्त्री महासेठले घोषणा गरे।
उनले जनकपुर–जयनगर रेल सञ्चालनको अन्तिम तयारी भैरहेकोले छिट्टै भारतबाट दुई सेट रेल ल्याउने बताए। सार्वजनिक खरिद ऐन संशोधनको प्रक्रियामा रहेकोले यसमा व्यवसायीहरुको जायज सुझावलाई सरकारले ग्रहण गर्ने उनले प्रतिबद्धता जनाएम।
हुलाकी राजमार्ग, मदन भण्डारी राजमार्ग, मध्यपहाडी राजमार्ग र महेन्द्र राजमार्ग विस्तार लगायतका महत्वपूर्ण आयोजनाहरु तोकिएको समयावधिभन्दा अगावै सम्पन्न गरिसक्ने उनले जनाए।