अमेरिकी राष्ट्रपति डोनाल्ड ट्रम्पले कस्मिर मुद्दा सुल्झाउन भारतीय प्रधानमन्त्री नरेन्द्र मोदीले आफूलाई मध्यस्थताका लागि आग्रह गरेको बताएका छन्।
पाकिस्तानी प्रधानमन्त्री इमरान खानसँग ह्वाइट हाउसमा सोमबार भएको भेटका क्रममा ट्रम्पले केही समयअघि मोदीले आफूलाई त्यस्तो आग्रह गरेको बताएका हुन्।
भेटपछि पाकिस्तानी प्रधानमन्त्री खानलाई ७० वर्षदेखि कस्मिरमा जारी द्वन्द्व सल्टाउन अमेरिकाले सहयोग गर्न सक्छ भनी सोधिएको थियो। जवाफमा इमरानले राष्ट्रपति ट्रम्प प्रमुख भएको शक्तिशाली देश अमेरिकाले मात्र भारत र पाकिस्तानलाई सँगै ल्याउन सक्ने बताए।
त्यसपछि ट्रम्पले केही साताअघि मोदीसँग भएको आफ्नो भेटको प्रसंग सुनाए। जुन अन्तिम साता जापानमा भएको जी-२० सम्मेलनका क्रममा ट्रम्प र मोदीबीच भेट भएको थियो।
‘उनले तपाईं मध्यस्थ बन्न चाहनुहुन्छ कि निर्णायक भनेर सोधे। मैले भनें-कहाँ? उनले भने-कस्मिरमा। किनकी यो वर्षौंदेखि चलिरहेको छ,’ ट्रम्पले मोदीलाई दिएको जवाफबारे भने,‘मैले सहयोग गर्न सक्छु भने म मध्यस्थकर्ता बन्छु।’
वासिङट्नबाट ट्रम्पको यो भनाइ सार्वजनिक भएको केहीबेरमै नयाँदिल्लीले त्यसलाई अस्वीकार गरेको छ।
भारतीय विदेश मन्त्रालयका प्रवक्ता रविशकुमारले सोमबार राति ट्वीट गर्दै ट्रम्पको भनाइबारे मिडियाबाट जानकारी पाएको तर मोदीले त्यस्तो आग्रह नगरेको बताए।
‘भारतका प्रधानमन्त्रीले ट्रम्पसँग त्यस्तो कुनै आग्रह गर्नुभएको छैन। पाकिस्तानसँगका सबै मुद्दाहरू द्वीपक्षीय रूपमा सुल्झाउनु पर्छ भन्ने भारतको मान्यता कायम छ,’ उनले भनेका छन्,‘पाकिस्तानसँगको कुनै पनि वार्ताका लागि अन्तरदेशीय आतंकवादी गतिविधिको अन्त्य हुनुपर्छ। सिमला सम्झौता र लाहोर घोषणापत्रले पाकिस्तान र भारतबीचका सबै समस्या द्वीपक्षीय रूपमा समाधान गर्न आधार दिन्छन्।’
आणविक राष्ट्रहरू भारत र पाकिस्तानबीच कस्मिरबारे ७ दशक लामो विवाद जारी छ। यी दुई देशले दुई पटक युद्ध गरिसकेका छन्।
पछिल्लो समय गत फेब्रुअरीमा भारत प्रशासित कस्मिरको पुलवामा भारतीय सैनिक बलमाथि भएको आक्रमणपछि दुई देशको तनाव झन् चुलिएको छ।
कस्मिर विवादबारे पाकिस्तानले निरन्तर रूपमा अन्तर्राष्ट्रिय सहयोगको माग उठाइरहेको छ। यो मुद्दा समाधानका लागि अन्तर्राष्ट्रिय मध्यस्थता हुनुपर्ने पाकिस्तानको भनाइ छ। भारतले भने कस्मिर मुद्दा भारत-पाक मुद्दा भएकाले तेस्रो पक्षको संलग्नता अस्वीकार गर्दै आएको छ।