परराष्ट्रमन्त्री प्रदीपकुमार ज्ञवाली र नेपालका लागि मोरक्को अधिराज्यका राजदूत मोहम्मद मल्लिकीबीच शुक्रबार शिष्टाचार भेट भएको छ।
परराष्ट्र मन्त्रालयमा भएको भेटका अवसरमा उनीहरुबीच नेपाल–मोरक्को सम्बन्धका साथै पारस्परिक हित र चासोका विविध विषयमा विचारविमर्श भएको छ।
नेपालमा स्थायी सरकार गठन भएसँगै लगानीको वातावरण तयार भएकाले मोरक्कोका उद्यमी व्यवसायीलाई नेपालमा लगानी गर्न मन्त्री ज्ञवालीले आग्रह गरे।
उनले चार महिनापछि सुरु हुने नेपाल भ्रमण वर्ष २०२० मा नेपाल भ्रमणका निम्ति मोरक्कोका नागरिकलाई अभिप्रेरित गर्न समेत आग्रह गरेका थिए।
उनले बहुपक्षवादलाई प्रवद्र्धन गर्दै नेपाल र मोरक्कोबीच क्षेत्रीय र अन्तर्राष्ट्रिय मञ्चमा दुई देशबीच साझेदारी एवं सहकार्य भइरहेको बताए। रासस