नेपाल विद्युत प्राधिकरणका कार्यकारी निर्देशक कुलमान घिसिङले कर्णाली प्रदेशको जुम्लामा राष्ट्रिय ग्रिडमार्फत विद्युत पुर्याउने टेण्डर भएर ठेक्का सम्झौता भइसकेको बताएका छन्।
जुम्लाका सांसद गजेन्द्रबहादुर महतलले मंगलबारको संसद बैठकमा विद्युत समस्या समाधान गर्न गरेको फोन नियोजित रूपमा नउठाएको भन्ने आरोप लगाएका थिए। कुलमानले सांसद महतको आरोपमा कुनै सत्यता नरहेको दाबी गरेका छन्।
‘केही दिनअघि उहाँ (महत)ले फोन गर्नुभएको रहेछ, म बैठकमा थिएँ, पछि कल ब्याक गर्छु भन्दाभन्दै बिर्सिए छु, जुम्लाको विद्युत् समस्या समाधान गर्न प्राधिकरणले गम्भीर रूपमा काम गरिरहेको छ’,उनले भने, ‘जुम्लामा वितरण तथा ग्राहक सेवा केन्द्र खोल्ने निर्णय भइसकेको छ, सुर्खेतबाट ८१ किलोमिटर ३३ केभी प्रसारण लाइन लैजान गत जेठमै ठेक्का सम्झौता गरी ठेकेदारले सर्वेक्षण अन्तिम चरणमा पुर्याएको छ, डेढ वर्षभित्रमा ग्रिड पुर्याउने लक्ष्यकासाथ काम गरिरहेका छौं।’
उनले राष्ट्रिय ग्रिड नपुगेसम्म तत्कालका लागि अस्थायी रूपमा डिजेल जेनेरेटरमार्फत् जुम्लामा विद्युत् आपूर्ति गर्ने विकल्पबारे पनि छलफल भइरहेको बताए।
उनले प्राधिकरणको स्वामित्वमा रहेको रहेको लघु जलविद्युत स्थानीय उपभोक्ता समितिले भाडा (लिज)मा लिएर चलाएको बताए।
‘लिज सम्झौतामा मर्मतसम्भारको सम्पूर्ण जिम्मेवारी उपभोक्ता समितिकै रहेछ, त्यसैले हामीले केही गर्न सक्दैनौं’,घिसिङले भने।
यसअघि सत्तारूढ दल नेपाल कम्युनिष्ट पार्टी (नेकपा) का सांसद र महतले ऊर्जा मन्त्री वर्षमान पुन र नेपाल विद्युत प्राधिकरणका कार्यकारी निर्देशक कुलमान घिसिङ ‘श्री ३ महाराज’ भएको आरोप लगाएका थिए।
मंगलबार प्रतिनिधिसभाको विशेष समयमा सांसद महतले भने, ‘श्री ३ महाराज कुलमान घिसिङ र वर्षमानसँग भेट गर्न कसरी पाइने हो?’
उनले कर्णालीको जुम्लामा अहिले अँध्यारो रहेको कुरा उठाए। २०३८ सालमा बनेको दुई सय किलोवाटको बत्ती बिग्रिएर थन्किएको र बन्न तीन चार महिना लाग्ने उनले बताए।
यसबारे कुरा गर्न आफूले ऊर्जा मन्त्री पुन र विद्युत प्राधिकरणका निर्देशक घिसिङलाई भेट्न खोज्दा नपाएको गुनासो पोखे।
‘यति धेरै भेट्न कोशिस गर्यौं हाम्रो श्री ३ महाराजलाई। हाम्रो जिल्लाको समस्या कसरी राख्ने हो?,’ उनले प्रश्न गरे।
‘के विद्युत प्राधिकरण छैन यो नेपालमा? के जुम्ला जिल्ला भन्ने नाम छैन?’
सांसद महतले एक लाख जनसंख्या भएको जुम्लामा अहिले मोबाइल चलाउन नपाएर गार्हो भएको बताए।
उनले भारतलाई बत्ती बेच्दैछौं भन्नेहरूलाई जुम्लालाई बत्ती बेचिदिन आग्रह गरे।
‘भारतलाई बत्ती बेच्दैछौं भन्छन्, कृपया जुम्लालाई बेच्नुस्। तपाईंहरूको बत्ती कति छ हामीलाई बेच्नुस्,’ उनले भने।
उनले जुम्लामा पनि बिरामी, विद्यार्थी रहेको भन्दै ‘श्री ३ महाराज’लाई जुम्लाको समस्या हेरिदिन आग्रह गरे।
.JPG)
