प्रधानमन्त्री केपी शर्मा ओलीले आफ्नो स्वास्थ्य अवस्थाप्रति चासो राखेर चिन्ता व्यक्त गर्नेलाई धन्यवाद दिएका छन्।
सिंगापुरमा उपचार गरेर सोमबार स्वदेश फर्किएका ओलीले विमानस्थलमा स्वास्थ्य अवस्थाबारे पत्रकारको जिज्ञासामा ठोस जवाफ दिएका थिएनन्।
दिउँसो ट्वीट गर्दै आफ्नो स्वास्थ्य सामान्य रहेको उल्लेख गरेका छन्।
‘सिंगापुरमा स्वास्थ्य परिक्षण गरी आज फर्किएको छु। मेरो स्वास्थ्य सामान्य रहेको छ,’ प्रधानमन्त्री ओलीले ट्वीट गरेका छन्, ‘स्वास्थ्य परीक्षणमा संलग्न सबै चिकित्सकप्रति आभार व्यक्त गर्दछु।’
प्रधानमन्त्रीले आफ्नो स्वास्थ्य अवस्थाबारे चिन्ता गर्नेलाई धन्यबाद दिएका छन्। ‘मेरो स्वास्थ्य स्थितिप्रति चासो राखी चिन्ता व्यक्त गर्ने र स्वास्थ्यलाभको कामना गर्नु हुने सबै दिदीबहिनी-दाजुभाईहरूलाई धन्यवाद दिन चाहन्छु,’ प्रधानमन्त्रीले ट्वीट गरेका छन्।
प्रधानमन्त्री ओली साउन १८ गते सिंगापुर गएका थिए।
ओलीको सिङ्गापुरस्थित नेशनल युनिभर्सिटी हस्पिटलमा आइतबारदेखि स्वास्थ्य परीक्षण थालिएको थियो। सुरूमा उनी शुक्रबार स्वदेश फर्किने कार्यतालिका थियो।
यसअघि ओली नियमित स्वास्थ्य परीक्षण गराउन थाइल्याण्ड गएका थिए।
