प्रधानमन्त्री तथा नेपाल कम्युनिष्ट पार्टी(नेकपा) का अध्यक्ष केपी शर्मा ओलीलाई ज्वरो आएपछि औपचारिक एजेन्डामा प्रवेश नगरी नेकपा सचिवालय बैठक स्थगित भएको छ।
‘प्रधानमन्त्रीलाई सामान्य ज्वरो आएपछि आराम गर्नको लागि बैठक भोलिसम्मको लागि स्थगित गरिएको हो’, पार्टी प्रवक्ता नारायणकाजी श्रेष्ठले भने।
स्थगित बैठक शुक्रबार ३ बजे बस्ने प्रवक्ता श्रेष्ठले जानकारी दिए।
विष्णु पौडेलको प्रतिवेदनमाथि सामान्य छलफल भएता पनि बैठक औपचारिक एजेन्डामा प्रवेश गरेन।
नेकपाले पार्टी विभागको नेतृत्व, जनवर्गीय संगठनका इन्चार्ज तथा सहइन्चार्ज, विभिन्न आयोगहरु, परिषद् र जेष्ठ नागरिक मञ्चको नेतृत्वको टुंगो लगाउन बाँकी छ।
स्कुल विभाग प्रमुखको जिम्मेवारीमा विवाद बढ्दै गइरेहको छ। छलफल पेचिलो बन्दै गएपछि स्कुल विभाग प्रमुखको जिम्मेवारी अहिलेका लागि दुई अध्यक्षले नै राख्नसक्ने सम्भावना रहेको सचिवालय स्रोतले जनाएको छ।
नीति तथा प्रतिष्ठानसहित ३३ विभागमध्ये १८ पूर्वएमाले र १४ पूर्वमाओवादीको भागमा परेको छ।
दुवै पक्षको दाबीका कारण विवादमा रहेको स्कुल विभागको नेतृत्वबारे नेकपाको नेतृत्व अहिलेसम्म अनिर्णित नै छ।
