प्रतिनिधिसभामा प्रतिनिधित्व गर्ने चार राजनीतिक दलले गणतन्त्र, संविधान र विधिको शासनमाथि प्रहार भइरहेको निष्कर्ष निकालेका छन्। प्रधानमन्त्री केपी शर्मा ओलीले पहिलोपटक आह्वान गरेको सर्वदलीय बैठकले संघीयता, गणतन्त्र र संविधानलाई क्षतविक्षत पार्ने खतरा रहेको भन्दै सबै एकजुट हुनुपर्ने निचोड निकालेको हो।
बैठकमा प्रधानमन्त्री केपी शर्मा ओलीले गणतन्त्र र संविधानमाथि प्रहार भइहरेको र त्यसरी प्रहार गर्नेहरुको सबै राजनीतिक दल मिलेर सामाना गर्नुपर्ने भन्दै सहयोगका लागि आग्रह गरेको नेकपाका प्रवक्ता नारायणकाजी श्रेष्ठले जानकारी दिए।
बैठकमा प्रधामन्त्रीले आफू ‘फलोअप’ उपचारका लागि बिहीबार सिंगापुर जान लागेको जानकारी पनि दलक नेताहरुलाई गराएका थिए। ‘मेरो स्वास्थ्यअवस्था ठिकै छ, फलोअपका लागि सिंगापुर जाँदैछु, दुई-चार दिन लाग्न सक्छ, हामीले शान्ति प्रक्रियाका कामहरु पनि छिट्टै टुंगो लगाउनु छ,’ प्रधानमन्त्रीको भनाइ उद्धृत गर्दै नेपाली कांग्रेसका नेता कृष्ण सिटौलाले भने।
बैठकमा प्रधानमन्त्रीले आफू सिंगापुर जानुअघि नै संक्रमणकालीन न्यायसम्बन्धी दुई आयोगहरुमा पदाधिकारी नियुक्त गरिसक्ने जानकारी गराएका थिए। यसका लागि बुधबार नेकपा र नेपाली कांग्रेसका नेताहरुको छुट्टै बैठक बस्दैछ।
बैठकमा प्रमुख प्रतिपक्षी दलका नेता तथा नेपाली कांग्रेसका सभापति शेरबहादुर देउवाले गणतन्त्र र संघीयतालाई बलियो बनाउने विषयमा आफूहरु सधैं सकरात्मक रहेको बताए। उनले कतिपय विषयवस्तुमा सरकार पनि गम्भीर र लचिलो भएर प्रस्तुत हुनुपर्ने सुझाव दिएका थिए। ‘प्रेस, मानवअधिकार आयोग, सुरक्षा परिषदलगायत विधेयकमा सरकारले लोकतान्त्रिक चरित्र देखाउन जरुरी छ, यी विषयहरुमा सरकार लचिलो हुनुपर्छ,’ देउवाको भर्ना उधृत गर्दै नेकपा संसदीय दलका उपनेता सुवासचन्द्र नेम्वाङले भने।
बैठकमा देउवाले सो धारणा राखेपछि नेम्वाङले यी विधेयकहरुका बारेमा सम्बन्धित पक्षहरुसँग पनि परामर्श गरिएको र सच्याएर अघि बढ्न तयार रहेको बताएका थिए। यस्तै, राजपाका राजकिशोर यादव र महन्थ ठाकुरले अहिले बदलिँदो राजनीतिक परिस्थितिबाट युवावर्गमा गणतन्त्रप्रति नै वितृष्णा पैदा भएको भन्दै त्यो परिस्थिति सुधार गर्न सरकारबाटै पहल गर्नुपर्ने सुझाव दिए।
बैठकमा प्रधानमन्त्री ओली, नेकपाका अध्यक्ष पुष्पकमल दाहाल, प्रमुख प्रतिपक्षी दल नेपाली कांग्रेसका सभापति शेरबहादुर देउवा, पूर्वप्रधानमन्त्रीहरू झलनाथ खनाल, बाबुराम भट्टराई सहभागी थिए।
नेकपाका शीर्ष नेतामध्ये माधवकुमार नेपाल सहभागी थिएनन्। बैठकमा नेकपाका मन्त्री रामबहादुर थापा, कानुन मन्त्री भानुभक्त ढकाल सहभागी थिए।
कांग्रेसबाट उपसभापति विजयकुमार गच्छदार, महामन्त्री पूर्णबहादुर खड्का, पूर्वमहामन्त्री कृष्णप्रसाद सिटौला, नेताहरू बालकृष्ण खाण, मिनेन्द्र रिजाल सहभागी थिए।
नेकपाका वामदेव गौतम, प्रवक्ता नारायणकाजी श्रेष्ठ, महासचिव विष्णु पौडेल उपस्थित थिए। उपप्रधानमन्त्रीसमेत रहेका समाजवादी पार्टीका अध्यक्ष उपेन्द्र यादव, राजपा नेता महन्थ ठाकुरलगायत पनि बैठकमा सहभागी भएका थिए।