प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीले आज मोतीहारी अमलेखगञ्ज पेट्रोलियम पाइप लाइनको उच्च प्रविधिको प्रयोग गरेर उद्घाटन गरेका छन्।
प्रधानमन्त्री ओलीले प्रधानमन्त्री कार्यलयमा रहेको एक्सन रूमबाट मोदीले नयाँ दिल्लीबाट स्विच दबाएर पाइपलाइनको उद्घाटन गरे। यो पाइपलाइन दक्षिण एसियाको पहिलो अन्तरदेशीय पेट्रोलियम पाइपलाइन हो।
उद्घाटन पछि भिडियो कन्फरेन्स मार्फत सम्बोधन गर्दै प्रधानमन्त्री ओलीले भारतबाट नेपालमा पेट्रोलियम पदार्थ ढुवानीमा समय बचत गर्ने, लागत बढाउने, सवारी यातायात कम गर्ने र वायु प्रदूषणलाई कम गर्ने बताए। प्रधानमन्त्री ओलीले यस प्रकारका पाइपलाइनहरुको विस्तारका लागि नेपालले अरू अवसर पनि दिने उल्लेख गरे।
‘यस पाइपलाइनले नेपाली उपभोक्ताहरुमा सकारात्मक प्रभाव परेको छ। आजैदेखि नेपाल आयल निगमले पेट्रोलियम पदार्थमा दुई रुपैंया मूल्य घटाएको छ,’ प्रधानमन्त्री ओलीले भने,‘यसबाहेक परियोजनाले दुई देशका बीचमा परस्पर सम्बन्ध र पारस्परिक निर्भरता बढाउनेछ। नेपाल र भारतको ट्रेड र ट्रान्जिट पूर्वाधारको सम्बन्धमा कनेक्टिभिटीको सर्वश्रेष्ठ उदाहरण समेत हुनेछ। यसका लागि म प्रधानमन्त्री मोदीजी र भारत सरकारलाई धन्यवाद दिन चाहन्छु।’
प्रधानमन्त्री ओलीले नेपालले भारतसँगको सम्बन्धलाई ठूलो महत्व दिएको बताएका छन्‘हाम्रा दुई देशबीचको सम्बन्ध यति गहन यसलाई जहाँ र जहिले पनि यसलाई बिस्तार गर्ने अवसर हुन्छ,’ प्रधानमन्त्री ओलीले भने।
प्रधानमन्त्री ओलीले नेपाल इतिहासको मह्तवपूर्ण मोडमा भएको उल्लेख गरे।
नेपाल र भारत दुबै स्पष्ट बहुमतको सरकारका साथ राजनीतिक स्थायित्वको स्थितिमा रहेको प्रधानमन्त्री ओलीको भनाइ छ।
‘बढ्दो आर्थिक वृद्धिदर,गतिशिल र सक्षम मानव संसाधनको उपलब्धताले हामीलाई विकास र समृद्धिका लागि आशाजनक वातावरण तयार गरेको छ,’ प्रधानमन्त्री ओलीले भने,‘यसले आपसी लाभका लागि दुई देशहरूबीच साझेदारी र सहयोगलाई थप सुदृढ पार्न सक्षम वातावरण पनि सिर्जना गरेको छ।’
प्रधानमन्त्री ओलीले नेपाल भारत सम्बन्धको लागि नयाँ जोश, गतिशिलता र दिशा प्रक्षेपण गर्नु आवश्यक रहेको उल्लेख गरे।
उद्घाटनपछि बोल्दै भारतका प्रधानमन्त्री नरेन्द्र मोदीले नेपालको प्राथमिकताअनुसार विकासमा सहयोग पुर्याउने प्रतिवद्धता व्यक्त गरे।
‘पछिल्ला केही वर्षमा हाम्राबीच उच्च राजनीतिक तहमा अभूतपूर्व सामिप्यता आयो र हामी नियमित सम्पर्कमा छौं। पछिल्लो डेढ वर्षमा मेरा मित्र प्रधानमन्त्री ओली र म चार पटक भेटिसकेका छौं,’ मोदीले भने,‘विकासका लागि हाम्रो साझेदारीलाई अझ सक्रिय बनाउने र नयाँ क्षेत्रमा सहयोगलाई अझ बढाउनेमा हामीले नयाँ अवसरको लाभ उठाएका छौं।’
उनले दुबै देशको संयुक्त प्रयासको उद्देश्य नागरिकलाई लाभ मिलोस् र उनीहरूको विकास होस् भन्ने भएको बताए।
‘पछिल्ला पाँच वर्षमा हामीले महत्वपूर्ण द्वीपक्षीय परियोजना पूरा गरेका छौं र केही अन्य प्रयासहरूको परिणाम हात पारेका छौं,’ मोदीले भने,‘यो धेरै सन्तोषको विषय हो कि दक्षिण एसियाको यो पहिलो क्रस बोर्डर पेट्रोलियम पाइपलाइन तोकिएकै समयभन्दा पहिला पूरा भयो। अपेक्षितभन्दा आधा समयमा यो तयार भयो। यसको श्रेय तपाईंको नेतृत्व र नेपाल सरकारको सहयोग र हाम्रा संयुक्त प्रयासलाई जान्छ।’
उनले २०७२ सालको विनाशकारी भूकम्पपछि जब नेपालले पुनर्निर्माणको कार्यभार उठाएपछि भारतले आफ्नो छिमेकी र निकटतम् मित्रका नाताले आफ्नो हात सहयोगका लागि अघि बढाएको बताए।
‘मलाई धेरै खुसी छ कि नेपालका गोरखा र नुवाकोट जिल्लामा हाम्रो आपसी सहयोगमा फेरि घर बनिरहेका छन्। आमनागरिक टाउको लुकाउने छत पाएका छन्,’ मोदीले भने,‘हामी आफ्ना सहयोगका सबै क्षेत्रमा प्रगति गरिरहेका छौं। मलाई आशा छ कि हामी आफ्नो हिस्सालाई अझ व्यापक बनाउने तथा विविध क्षेत्रमा आफ्नो साझेदारीलाई अझ गहिरो बनाउनका लागि अझ तीव्र रूपमा अघि बढ्नेछौं।’
