संसद सचिवालयमा कार्यरत महिला कर्मचारीलाई बलात्कार गरेको आरोप लागेपछि कृष्णबहादुर महराले सभामुखबाट राजीनामा दिएका छन्।
महराले मंगलबार स्वकीय सचिवमार्फत् उपसभामुख शिवमाया तुम्बाहाम्फेलाई बुझाएको राजीनामा ‘लटरपटर’ छ। राजीनामा पत्रमा उनले छानबिन प्रकिया नसकिँदासम्मका लागि राजीनामा दिएको बताएका छन्।
उक्त राजीनामा पत्रमा महराले प्रतिनिधि सभाका सभामुखको लेटर प्याड प्रयोग गरेका छन्। उनले बुझाएको राजीनामा पत्रले सभामुखबाट मात्र राजीनामा दिएको बुझिन्छ।
आजै बिहान बसेको नेपाल कम्युनिष्ट पार्टीको सचिवालय बैठकले भने उनलाई सभामुख र सांसद दुबै पदबाट राजीनामा दिन भनेको थियो।
उपसभामुखलाई आज बुझाएको राजीनामा पछि उनी सभामुख पदबाट मुक्त भएका छन्।
महराले सांसद पदबाट मुक्त हुन फेरि अर्को राजीनामा दिनु पर्ने नेकपाका एक नेताले बताए।
‘उहाँले सांसद पदबाट पनि राजीनामा दिनुपर्छ। नदिए पार्टीले उहाँलाई सांसदको हैसियतमा व्यवहार गर्दैन,’ उनले भने।
महराले सांसदबाट पनि उपसभामुख तुम्बाहाम्फेलाई नै राजीनामा बुझाउनु पर्छ। सभामुख पदको राजीनामा कसैले स्वीकृत गर्न नपर्ने भए पनि सांसदको राजीनामा उपसभामुखले स्वीकृत गर्नु पर्ने हुन्छ।
महरा २०७४ को प्रतिनिधि सभा निर्वाचनमा दाङ-२ बाट निर्वाचित भएका थिए।
यो पनि पढ्नुस्:
