नेपाल कम्युनिष्ट पार्टी (नेकपा) र नेपाली कांग्रेस काभ्रेपलाञ्चोकलाई एक स्थानीय तहमा वडाध्यक्षको उम्मेदवार छान्न निकै सकस परेको छ। धुलिखेल नगरपालिका-२ का लागि दुई हप्तादेखिको छलफलले नेकपा र कांग्रेसले वडाध्यक्षको उम्मेदवारबारे कुनै निष्कर्ष निकाल्न सकेको छैनन्।
नेकपाका जिल्लाध्यक्ष रुकु चौलागाईंले यसबारे पार्टीको जिल्ला नेतृत्व र स्थानीय नेता गम्भीर छलफलमा जुटेकाले यो हप्तासम्ममा वडाध्यक्षको उम्मेदवार टुङ्गो लगाइने बताए।
‘निर्वाचित हुने पक्का भएको स्थानमा उम्मेदवार छान्न सकस नै हुन्छ,’ उनले भने।
नेकपाका चार जनाले वडाध्यक्षको उम्मेदवारीमा दाबी गर्दै आएको अध्यक्ष चौलागाईंले बताए। हालसम्म नेकपा स्थानीय तह नगर र गाउँ कमिटी गठन नहुँदा जिल्ला कमिटी नेतृत्वले नै वडाध्यक्षको उम्मेदवार छान्न छलफल चलाउँदै आएको हो। काभ्रेपलाञ्चोकको १३ स्थानीय तहमा १६५ वडा छन्।
तत्कालीन निर्वाचित वडाध्यक्ष राजन कोइरालाको उपचारका क्रममा २०७४ भदौ १० गते मृत्यु भएको थियो। निर्वाचित भएको तीन महिनापछि अर्थात् २०७४ भदौ ४ गते साँझ घर नजिकै अज्ञात समूहको आक्रमणबाट टाउको र छातीमा गम्भीर चोट लागि अचेत भई लडिरहेको अवस्थामा भेटिएपछि उनलाई उपचारार्थ अस्पताल लगिएको थियो।
प्रमुख प्रतिद्वन्द्वीका रूपमा नेपाली कांग्रेसबाट गत निर्वाचनमा वडाध्यक्षमा पराजित बलराम कोइरालालगायत तीन जनाले वडाध्यक्ष उम्मेदवार आकांक्षी देखाएपछि कांग्रेसको धुलिखेल नपा–२ वडा समितिले क्षेत्रीय समिति हुँदै जिल्ला समितिलाई सिफारिस गरेको छ।
‘वडाध्यक्षको उम्मेदवार अब जिल्ला कार्य समितिले चयन गर्नेछ’, कांग्रेस ४ नम्बर क्षेत्रीय सभापति महेश खरेलले भने।
निर्वाचन आयोगले स्थानीय तहमा उपनिर्वाचनका उम्मेदवारका लागि कात्तिक २७ गते उम्मेद्वारी दर्ता र २९ गते अन्तिम नामावली प्रकाशन तथा आउँदो मङ्सिर १४ गते मतदानको कार्यतालिका तय गरेको छ।
