मंसिर १४ गते हुने उपनिर्वाचनका लागि आज बिहीबार दलहरूले उम्मेदवारको मनोनयन दर्ता गर्ने तयारी गरेका छन्।
निर्वाचन आयोगले उपनिर्वाचन हुने जिल्लाहरूमा मुख्य निर्वाचन अधिकृत र निर्वाचन अधिकृत कार्यालय खोलिसकेका छन्। बिहीबार बिहान १० बजेदेखि दिउँसो १ बजेसम्म प्रतिनिधिसभा र प्रदेशसभा निर्वाचनका लागि उम्मेदवारी दर्ताको समय दिइएको छ। संघीय संसदका लागि कास्की २ मा निर्वाचन हुँदैछ।
२०७४ सालमा भएको निर्वाचनबाट विजयी रवीन्द्र अधिकारीको हेलिकप्टर दुर्घटनामा निधन भएपछि रिक्त पदका लागि निर्वाचन हुन लागेको हो।
प्रदेशसभा निर्वाचनका लागि भक्तपुर क्षेत्र १ को क, दाङ क्षेत्र नम्बर ३ को ख र बागलुङ क्षेत्र नम्बर २ को खमा उपनिर्वाचनका लागि बिहीबार मनोनयन दर्ता हुन लागेको हो।
स्थानीय तहमा रिक्त स्थानका लागि भने आयोगले कात्तिक २७ गते मनोनयन दर्ता गर्ने कार्यतालिका सार्वजनिक गरेको छ।
उपनिर्वाचन हुन लागेका ठाउँमा मुख्यगरी सत्तारूढ नेपाल कम्युनिष्ट पार्टी (नेकपा) र प्रमुख प्रतिपक्षी नेपाली कांग्रेसका उम्मेदवारबीच प्रतिस्पर्धा हुने देखिएको छ।
नेकपा, कांग्रेस, राप्रपा, राष्ट्रिय जनमोर्चा, साझा पार्टी, विवेकशील नेपाली दललगायतले उपनिर्वाचनमा उम्मेदवार उठाउने घोषणा गरिसकेका छन्।
कहाँ को-को भिड्दैछन्?
कास्की -२ (प्रतिनिधिसभा)
कास्की -२ मा सत्तारूढ नेकपाले हेलिकप्टर दुर्घटनामा मृत्यु भएका तत्कालीन संस्कृति, पर्यटन तथा नागरिक उड्डयन मन्त्री रवीन्द्र अधिकारीकी पत्नी विद्या भट्टराईलाई उम्मेदवार बनाउने भएको छ।
उनी विद्यार्थी राजनीतिमा सक्रिय थिइन् भने त्रिभुवन विश्वविद्यालयमा समाजशास्त्र पढाउँदै आएकी थिइन्। यहाँ नेपाली कांग्रेसले खेमराज पौडेललाई उम्मेदवार बनाएको छ। ७० कटेका पौडेल कांग्रेस कास्की जिल्ला सभापति भइसकेका नेता हुन्। सभापति शेरबहादुर देउवाले कांग्रेस प्रजातान्त्रिक गठन गर्दा पौडेल सभापति थिए।
रवीन्द्र मिश्र संयोजक रहेको साझा पार्टीले रजनी केसीलाई र मिलन पाण्डे अध्यक्ष रहेको विवेकशील नेपाली दलले जमुना शर्मालाई उम्मेदवार बनाएका छन्।
भक्तपुर १ प्रदेशसभा (क)
सत्तारूढ नेकपाले देवीप्रसाद ढकाललाई उम्मेदवार बनाएको छ भने कांग्रेसले कृष्ण भँडेललाई उम्मेदवार बनाएको छ। यहाँ साझाबाट सुरज प्रधान उम्मेदवार छन्।
बागलुङ २ प्रदेशसभा (ख)
सत्तारूढ नेकपाले यो क्षेत्र राष्ट्रिय जनमोर्चालाई छाडेको छ।
पहिले पनि यहाँ जनमोर्चाकै उम्मेदवारले चुनाव जितेका थिए। जनमोर्चाका खिमविक्रम शाहीलाई नेकपाले सघाउने भएको छ। यहाँ कांग्रेसका जित शेरचन र विवेकशीलका सन्तोष भण्डारी उम्मेदवार छन्।
दाङ -३ प्रदेशसभा (ख)
दाङको प्रदेशसभा सदस्यका लागि नेकपाकी विमला वली, कांग्रेसका केशव आचार्य र साझा पार्टीका शिव चौधरीबीच चुनावी प्रतिस्पर्धा हुन लागेको छ।
दलहरूले चुनाव हुने क्षेत्रहरूमा प्रचारप्रसारका काम सुरू गरिसकेका छन्।
३७ जिल्लाका ५२ स्थानमा उपनिर्वाचन हुन लागेको हो। उपनिर्वाचनमा एक सय एक दलले भाग लिन लागेको निर्वाचन आयोगले जानकारी दिएको छ।
यी क्षेत्रमा कूल चार लाख ५४ हजार एक सय १५ जना मतदाता छन्।
