प्रधानमन्त्री एंव नेपाल कम्युनिष्ट पार्टीका अध्यक्ष केपी शर्मा ओलीले आफूले पार्टी सचिवालय बैठकमा राष्ट्रपतिलाई संकटकालीन अधिकार दिने र राष्ट्रिय सभामा सिट संख्या थप्ने प्रस्ताव नराखेको स्पष्ट पारेका छन्।
प्रधानमन्त्री ओलीका प्रेस सल्लाहकार सूर्य थापाले ट्विट गर्दै प्रधानमन्त्री ओलीले यस्तो कुनै प्रस्ताव नराखेको दाबी गरेका हुन्।
गत शनिबार बसेको सचिवालय बैठकमा प्रधानमन्त्री ओलीले राष्ट्रपतिलाई संकटकालीन अधिकार दिने र राष्ट्रिय सभामा सिट संख्या थप्ने प्रस्ताव राखेको भनेर आएका समाचारहरूको समेत थापाले खण्डन गरेका छन्।
शनिबारको सचिवालय बैठकले राष्ट्रिय सभाको सदस्य पनि प्रधानमन्त्री हुन पाउने र राष्ट्रिय सभा सदस्य थप्नेबारे छलफल गर्न कार्यदल बनाएको थियो।
बरिष्ठ नेता माधवकुमार नेपालको संयोजकत्वमा गठन भएको कार्यदलमा सुवास नेम्वाङ र खिमलाल देवकोटा राखिएको थियो। नेम्वाङ र देवकोटा दुबैले कार्यदलमा बस्न अस्वीकार गरेका थिए। चौतर्फी बिरोध भएपछि कार्यदलसमेत विघटन भएको छ।
