चौरजहारी घटना छानविन गर्न संसदीय समिति गठन गर्न कांग्रेसको माग

सेतोपाटी संवाददाता

काठमाडौं, जेठ १३

प्रमुख प्रतिपक्षी नेपाली कांग्रेसले रूकुम पश्चिमको चौरजहारी वडा नम्बर ८ मा गत शनिबार भएको घटनाबारे छानविन गर्न संसदीय छानविन समिति गठन गर्न माग गरेको छ।

मंगलबार प्रतिनिधिसभामा कांग्रेसका प्रमुख सचेतक बालकृष्ण खाँणले संसदीय छानविन समिति गठन गर्न माग गरेका हुन्। घटनाबारे गृहमन्त्रीको जवाफ माग्दै कांग्रेस सांसदले बैठकको सुरूमै उठेर विरोध गरेका थिए।

‘संसदीय छानविन समिति गठन होस्। त्यसले मात्रै सत्यतथ्य बाहिर ल्याउँछ,’ कांग्रेस सांसद अमरेशकुमार सिंहले भने।

कांग्रेसले जाजरकाेट र रूकुम पश्चिम दुबै जिल्लाका संघीय संसदमा प्रतिनिधित्व गर्ने सांसदहरू सम्मिलित संसदीय छानविन समिति गठन गर्नुपर्ने माग राखेको हो।

घटनाबारे गृह मन्त्रालयले सहसचिवको नेतृत्वमा पाँच सदस्यीय छानविन समिति गठन गरेको छ। रूकुम पश्चिममा भएको उक्त घटनामा जाजरकोटका नवराज विकसहित तीन जनाको मृत्यु भएको छ भने तीन जना बेपत्ता छन्।

जाजरकोटका नवराज आफ्नी प्रेमिकालाई लिन शनिबार साँझ गाउँका १८ युवासहित चौरजहारी पुगेका थिए। उनीहरूमाथि वडाध्यक्षकै नेतृत्वमा कुटपिट र हत्या भएको आरोप छ।

प्रकाशित मिति: मंगलबार, जेठ १३, २०७७ ०४:१८

सिफारिस