नेपाली कांग्रेसले रूकुम पश्चिमको चौरजहारी नगरपालिका वडा नम्बर ८ मा भएको घटनाको छानविन गर्न सर्वपक्षिय संसदीय छानविन समिति गठन गर्न माग गरेको छ।
गत शनिबार आफ्नी प्रेमिका लिन चौरजहारी पुगेका जाजरकोटका नवराज विक र उनका चार जना साथीमाथि आक्रमण हुँदा मृत्यु भएको थियो। घटनामा एक जना अझै बेपत्ता छन्।
उक्त घटनाबारे सत्यतथ्य छानविन गर्न गृह मन्त्रालयले सहसचिवको नेतृत्वमा पाँच सदस्यीय छानविन समिति गठन गरेर समितिले छानविन सुरू गरिसकेको छ।
तर शनिबार राति सकिएको कांग्रेस केन्द्रीय कार्यसमिति बैठकले ‘रूकुम हत्याकाण्डबारे सर्वदलीय संसदीय छानविन समिति गर्न माग’ गरेको हो।
‘रूकुमको चौरजहारीमा भएको बर्बर एवं सामुहिक हत्याकाण्डको निष्पक्ष अनुसन्धानका लागि सर्वदलीय संसदीय समिति गठन गर्न यो बैठक सरकारसँग माग गर्दछ,’ कांग्रेसले गरेको निर्णयमा भनिएको छ।
यस्तै प्रेम सम्बन्धमा जातीय प्रश्न खडा गरेर भएको हत्याका दोषीलाई कडा कारवाही गर्न पनि केन्द्रीय समितिले माग गरेको हो।
कांग्रेसले वैशाख १८ मा रोल्पा त्रिवेणीमा वेवारिसे बम विस्फोटबाट चार जना बालबालिकाको मृत्यु भएको घटनाबारे पनि अनुसन्धान गर्न माग गरेको छ।
‘चार जना अबोध बालबालिकाको निधन भएको घटनाबारे हालसम्म अनुसन्धान र दोषी पहिचान नगरिएकोमा यो बैठक तत्काल गहिरो अनुसन्धान गर्न र दोषीलाई कारवाही गर्न माग गर्दछ,’ केन्द्रीय समितिको निर्णयमा भनिएको छ।
