कृषि तथा पशुपंक्षी विकासमन्त्री घनश्याम भुसालले सामाजिक सञ्जालमा कमेन्ट गरेजस्तो काम गर्न सजिलो नभएको स्वीकार गरेका छन्।
संघीय संसद प्रतिनिधि सभा अन्तर्गतको कृषि तथा प्राकृतिक स्रोत समितिको बिहीबारको बैठकमा उपस्थित भएका मन्त्री भुसालले नेपालमा उत्पादन भएको दूधजन्य वस्तुहरुको विक्री गर्न नसकेको स्वीकार गर्दै कमेन्ट गर्नजस्तो काम गर्न सजिलो नभएको बताए।
उनले पहिला आफूलाई पनि त्यस्तै लाग्ने गरेको तर अहिले काम गर्न कठिन भइरहेको बताए।
उनले भने ‘दूधको बटर हामीसँग एक हजार मेट्रिक टन बढी भइसकेको छ, थुप्रिएको छ। उत्पादनको हिसाबले १५ सय मेट्रिक टन पाउडर दूध थुप्रिएको छ। त्यो बेच्नु पर्ने छ, त्यसको करिब करिब दुई-ढाई अर्ब त्यहाँ रोकिएको छ। अफगानिस्तान, पाकिस्तान कहाँ बेच्न पाइन्छ भनेर प्रयत्न गरिएको छ, सकिएको छैन। सेना पुलिसलाई खुवाउन सकिन्छ कि भनिएको थियो त्यो पनि सकिएको छैन। माघदेखि मात्रै ठेक्का लाग्दो रैछ त्यसले गर्दा प्रोबोलम छ। मान्छेहरुले सामान्य फेसबुकमा, बाटोमा यसो गरिदिए हुन्छ नी भन्छन्, मलाई पनि त्यस्तो लाग्थ्यो त्यो सजिलो रहिन्छ।’
उनले किसानलाई उपलब्ध गराउने मलको विषयमा पनि समस्या रहेको बताए। अहिले सरकारसँग १५ हजार मेट्रिक टन युरिया, २० हजार टन डिएपी मल र साढे पाँच हजार मेट्रिक टन जति पोटास रहेको तर त्यतिले नपुग्ने उनले बताए । आयातको क्रममा रहेको मल पनि ढुवानीमा समस्या हुँदा ल्याउन नसकिएको उनको भनाइ छ।
कृषि पेशामा लाग्ने किसानहरुको न्यूनतम बचत सहितको आम्दानीको सुरक्षा गर्नु नै कृषि क्षेत्रको लागि सबैभन्दा ठूलो काम हुने बताए। उनले अनुदान दिएर भन्दा किसानको उत्पादनको बजारीकरण र बचत सहितको आम्दानीको सुनिश्चितता गराउने गरी काम गरिने बताए।
यस्तै पछिल्लो समय सलह आउने चिन्तामा किसानहरु रहेको भन्दै त्यसको लागि मन्त्रालयले कसरी नियत्रण गर्ने भन्ने सम्बन्धमा समिति गठन गरी अध्ययन गरिएको जानकारी समितिलाई गराए।