सत्तारूढ नेपाल कम्युनिष्ट पार्टीका दुई अध्यक्षबीचको असहमति छताछुल्ल भएर पार्टी विभाजनको संघारमा पुगेपछि रूपन्देहीका नेकपानिकट युवा विद्यार्थीले पार्टी विभाजन नगर्न दबाब दिएका छन्।
रूपन्देहीको भैरहवास्थित पार्टी कार्यालयमा भेला भई पार्टीभित्रको असहमतिलाई विधि र पद्धतिबाटै समाधान गर्न दबाब स्वरूप धर्ना दिएका हुन्।
अनेरास्ववियूका केन्द्रीय सदस्य लक्ष्मी केसी, नेकपा रुपन्देहीका सदस्य जीवलाल अर्याल, नेकपा सिद्धार्थनगर सचिवालय सदस्य नारायणप्रसाद भण्डारीको नेतृत्वमा गरिएको धर्ना कार्यक्रममा युवा विद्यार्थीसँगै नेकपाका जिल्ला स्तरका नेताको समेत सहभागिता थियो। उनीहरूले शीर्ष नेतृत्वले आ-आफ्ना हठ त्यागेर संकटमा पुगेको पार्टी एकतालाई जोगाउन आग्रह गरेका छन्।
उनीहरूले शीर्ष नेताहरूलाई पार्टीको संस्थागत निर्णय मान्न र आ-आफ्ना कमीकमजोरी सच्चाउन आग्रह गर्दै पार्टी एकतालाई तल्लो स्तरमा विस्तार नगरिसकेको अवस्थामा शीर्ष नेतृत्वबाटै फुटको अवस्थामा ल्याउनु दुर्भाग्यपूर्ण भएको बताए।
उनीहरू ‘तिमी पार्टी मान्दैनौ? पार्टी नमान्नेलाई हामी नेता मान्दैनौं, व्यक्ति होइन, नीतिप्रधान पार्टी निर्माण गरौं, पार्टी एकता जिन्दावाद, कम्युनिष्ट पार्टी नीति प्रधान हो, नेता प्रधान होइन’ जस्ता नारा लेखिएका प्ले कार्ड बोकेर धर्नामा सहभागी भएका थिए।