नेपाल कम्युनिष्ट पार्टी नेकपाको प्रचण्ड-नेपाल पक्षको स्थायी कमिटी बैठकले कामचलाउ सरकारले भारतसँग कुनै पनि सम्झौता नगर्न आग्रह गरेको छ।
आज पेरिसडाँडामा बसेको बैठकले गरेका निर्णयबारे जानकारी दिँदै नेता भीम रावलले भारत भ्रमणका क्रममा कुनै पनि सम्झौता नगर्न चेतावनी दिएका छन्।
‘नेपालको अतिक्रमित भूमि लिम्पियाधुरा, लिपुलेक र कालापानीमा नेपालको हकभोग कायम गर्न नेपाली जनता र संसदले एकमत भई भारतसँग सार्थक वार्ताका लागि आग्रह गर्दा त्यसतर्फ ध्यान नदिने प्रधानमन्त्री केपी शर्मा ओलीले प्रतिनिधि सभा विघटन गरिएको एवं संविधानविपरीतका काम गर्दै सरकार कामचलाउ रूपमा रहेको हालको समयमा भारत भ्रमण गरी वार्ता आरम्भ गर्ने कार्य सन्देहपूर्ण छ। यस्तो स्थितिमा राष्ट्रिय हितमा आँच आउने कुनै सहमति, सम्झौता र कामकुरा नगर्न चेतावनी दिँदै त्यसो गरिएमा नेपाली जनताका लागि मान्य नहुने कुरा यो बैठक स्पष्ट गर्दछ,’ बैठकपछि नेता रावलले भने।
परराष्ट्र मन्त्री प्रदीप ज्ञवाली अहिले भारत भ्रमणमा छन्।
यस्तै भारतीय टिभी जी न्यूजका सुधीर चौधरीसँग बालुवाटारमा प्रधानमन्त्री केपी शर्मा ओलीले अन्तर्वार्ता दिँदै उनलाई सगरमाथा भ्रमणको प्रबन्ध गरी पठाएको आरोप पनि बैठकको छ।
‘सगरमाथाको नाम परिवर्तन र भारतले सगरमाथामा दाबी गर्नुपर्छ भन्नेजस्तो हाँस्यास्पद अभिव्यक्ति दिएकोमा यो बैठक भर्त्सना गर्दछ,’ उनले भने, ‘यस्तो संवेदनशील विषयमा संविधान विपरीतका क्रियाकलाप गर्ने सरकारको रहस्यमय मौनताको यो बैठक निन्दा गर्दछ।’
उनले प्रतिनिधि सभा विघटनविरूद्ध पार्टीले आन्दोलन जारी राख्ने पनि बताएका छन्।
यस्ता छन् प्रचण्ड-नेपाल समूहको स्थायी कमिटी बैठकका निर्णय :
१) नेपालको अतिक्रमित भूमि लिम्पियाधुरा, लिपुलेक र कालापानीमा नेपालको हकभोग कायम गर्न नेपाली जनता र संसदले एकमत भई भारतसँग सार्थक वार्ता गर्नको लागि आग्रह गर्दा त्यसतर्फ ध्यान नदिने प्रधानमन्त्री केपी शर्मा ओलीले प्रतिनिधि सभा विघटन गरिएको एवम् संविधान विपरीतका काम गर्दै सरकार काम चलाउरूपमा रहेको हालको समयमा भारत भ्रमण गरी वार्ता आरम्भ गर्ने कार्य सन्देहपूर्ण छ। यस्तो स्थितिमा राष्ट्रिय हितमा आँच आउने कुनै पनि सहमति, सम्झौता र कामकुरा नगर्न चेतावनी दिँदै त्यसो गरिएमा नेपाली जनताको लागि मान्य नहुने करा यो बैठक स्पष्ट गर्दछ।
२) नेपाल विरोधी अभियान चलाउँदै आएको भारतीय जी न्यूजका सुधीर चौधरीसँग सरकारी निवास, बालुवाटारमा प्रधानमन्त्री केपी शर्मा ओलीले अन्तर्वार्ता दिनुका साथै निजलाई सगरमाथा निकट कालापत्थरको भ्रमणको प्रबन्ध गरी पठाइनु र त्यहाँ निजले सगरमाथाको नाम परिवर्तन गर्नुका साथै त्यसमा भारतले दाबी गर्नुपर्ने भन्ने जस्तो अभिव्यक्ति दिएकोमा यो बैठक भत्सर्ना गर्दछ। यस्तो संवेदनशील विषयमा संविधान विपरीतका क्रियाकलाप गर्ने सरकारको रहस्यमय मौनताको यो बैठक निन्दा गर्दछ।
३) नेपालको कृषि क्षेत्रमा सहकारी, सामुदायिक र निजी क्षेत्रबाट लामो समयदेखि हुँदै आएको लगानीको फलस्वरूप कतिपय उत्पादनमा देश आत्मनिर्भरताको बाटोमा अग्रसर भइरहेको समयमा कृषि क्षेत्रलाई समेत विदेशीहरूको खेल मैदान बनाई उनीहरूलाई पोस्ने दुराशयका साथ नेपाल सरकारले कृषि क्षेत्रमा विदेशी लगानी भित्र्याउने भनी गरिएको निर्णयको यो बैठक विरोध गर्दछ। यस्तो नेपाली कृषकहरूको हित विरोधी निर्णय रद्द गर्न यो बैठक माग गर्दछ।
४) संविधान विपरीतका गतिविधि बढाउँदै सरकारले सरकारी साधन र स्रोतहरूको निर्लज्ज रूपमा गुट स्वार्थमा गरिरहेको दुरूपयोग, राज्यका विभिन्न अंग, निकाय र कार्यालयलाई निहित स्वार्थका लागि दिइरहेको दबाव र धम्की, तथा प्रशासन र सुरक्षा निकायमा अन्धाधुन्धा रूपमा गरिरहेको सरूवाको यो बैठक निन्दा गर्दछ।
साथै सरकारी सञ्चार माध्यमलाई लोकतन्त्रको सामान्य मान्यताविपरीत एकलौटी रूपमा दुरूपयोग गरिरहेकोमा त्यस्तो कार्यको यो बैठक विरोध गर्दछ र सरकारी सञ्चार माध्यमलाई स्वतन्त्र र निष्पक्ष रूपमा काम गर्न दिन यो बैठक माग गर्दछ।
५) केन्द्रीय कमिटीका सदस्य कमरेड दिनेशचन्द्र यादवको ७० वर्षको उमेरमा असामयिक निधन भएकोमा दुःख व्यक्त गर्दै उहाँप्रति हार्दिक श्रद्धाञ्जली अर्पण गर्नुका साथै उहाँका शोकसन्तप्त परिवारजनमा यो बैठक गहिरो समवेदना प्रकट गर्दछ।
नेपाल कम्युनिष्ट पार्टी (नेकपा), स्थायी कमिटीका सदस्य कमरेड गोकर्ण विष्टकी आमा चिन्ता कुमारी विष्टको ९० वर्षको उमेरमा निधन भएकोमा, स्थायी कमिटीका सदस्य कमरेड चक्रपाणि खनालकी आमा मुमादेवी खनालको ९५ वर्षको उमेरमा निधन भएकोमा र केन्द्रीय कमिटीका सदस्य कमरेड जीवनराम श्रेष्ठका बुवा कृष्णराम श्रेष्ठको निधन भएकोमा दुःख व्यक्त गर्दै उहाँहरूप्रति हार्दिक श्रद्धाञ्जली अर्पण गर्नुका साथै शोकसन्तप्त परिवारजनमा यो बैठक गहिरो समवेदना प्रकट गर्दछ।