प्रतिनिधि सभा विघटन गर्न लगाउने शक्तिले नै अर्को खिलराज रेग्मीको खोजी गरिसकेको दाबी नेपाल कम्युनिष्ट पार्टी नेकपा प्रचण्ड-नेपाल पक्षका नेता वर्षमान पुनले गरेका छन्।
वैशाखपछि प्रधानमन्त्री केपी शर्मा ओली हट्ने र शक्ति केन्द्रले खोजिसकेका अर्का खिलराज आउने दाबी पुनको छ। उनले यो कुरा मंगलबार प्युठानमा बताएका हुन्।
पहिलो संविधानसभा भंग भएपछि तत्कालीन प्रधानन्यायाशीध खिलराज रेग्मीको अध्यक्षतामा मन्त्रिपरिषद गठन गरी निर्वाचन गरिएको थियो। पुनले त्यसबेलाकै जस्तो शक्तिकेन्द्रले अहिले पनि अर्को खिलराज खोजिसकेको दाबी गरेका छन्।
संविधानमा नभएको व्यवस्थाअनुसार राष्ट्रिय तथा अन्तर्राष्ट्रिय शक्ति केन्द्र र निकायहरूले सेटिङमा प्रतिनिधि सभा विघटन गरेको पछिल्ला घटनाक्रमले पुष्टि गरेको उनको भनाइ थियो।
ओलीले विरोधी र विपक्षीलाई पेलेर अझै डेढ, दुई वर्ष सत्ता टिकाउन खोजे पनि त्यो सम्भव नहुने पनि उनले दाबी गरेका छन्।
‘ओलीले सबैलाई पेलपाल गरेर अझै सत्ता चलाउँछु भन्ने सपना देख्नुभएको छ,’ उनले भने, ‘जसको सेटिङमा प्रतिनिधि सभा सिध्याउनुभयो उसैले वैशाखपछिका लागि अर्को खिलराजको खोजी गरिसकेको छ।’