नेपाली कांग्रेसका वरिष्ठ नेता रामचन्द्र पौडेलले सर्वोच्च अदालतले राष्ट्रलाई दुर्घटना हुनबाट बचाएको बताएका छन्।
मंगलबार सर्वोच्चले प्रतिनिधि सभा पुनर्स्थापना गर्ने प्रधानमन्त्री केपी शर्मा ओलीको कदमलाई बदर गरिदिएको छ।
सर्वोच्चको फैसलापछि प्रतिक्रिया दिँदै पौडेलले भने, ‘प्रधानमन्त्रीको कदम असंवैधानिक थियो, आज अदालतले पुनर्स्थापना गरेको छ। सत्यको विजय भएको छ।’
सर्वोच्चले राष्ट्रलाई दुर्घटनाबाट बचाएको उनले बताए। ‘अदालतले राष्ट्रलाई दुर्घटनाबाट बचाएको छ,’ उनले भने, ‘यो फैसलाको कांग्रेसले स्वागत गर्छ।’
उनले आफूले पहिलेदेखि नै पुनर्स्थापनाका कुरा गरिराखेको र पार्टीका केही नेताहरूले चुनावको हतारो गरेको पनि बताए।
‘हाम्रा कति साथीलाई चुनावको हतार थियो। चुनाव चुनाव। प्रजातन्त्रमा चुनाव सबैभन्दा ठूलो चुनाव भन्ने साथीहरू अब के भन्छन्?,’ उनले भने।
सभापति शेरबहादुर देउवाले केही दिन अगाडि नुवाकोटमा आयोजित कार्यक्रममा कांग्रेस चुनावको तयारी थाल्नुपर्ने बताएका थिए। उनले राजनीति गर्नेहरू चुनावबाट भाग्न नमिल्ने बताएका थिए।