नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले आन्दोलनका क्रममा सहकर्मीहरू फेरबदल भइरहने भएकोले ओली पक्षमा लागेका पूर्वमाओवादी नेताहरूलाई फर्काउन पहल नगर्ने बताएका छन्।
बुटवलमा माओवादी केन्द्रका पार्टी कार्यकर्ता भेलालाई सम्बोधन गर्दै आफूलाई छोडेर गएकाहरूले आफ्नो विश्वास र भरोसा तोडेको उनले बताए।
प्रचण्डले पूर्वमाओवादी नेताहरू रामबहादुर थापा बादल, लेखराज भट्ट, टोपबहादुर रायमाझी लगायतका नेताहरू एमालेमा बसेकोप्रति गुनासो गर्दै आन्दोलनमा यस्तो हुनु सामान्य विषय भएको बताए।
अध्यक्ष प्रचण्डले विगतमा आफूले उनीहरूप्रति धेरै विश्वास र भरोसा गरे पनि भरोसा तोडेकोले अब फर्काउन पहल नगर्ने बताए।
अध्यक्ष प्रचण्डले आफूलाई साथ दिनेहरूलाई पछाडि राखेर मन्त्री बनाएकाहरूले नै धोका दिएको बताए।
‘विगतमा आफ्नै नजिक भएका साथीहरूलाई बाहिर राखेर भए पनि दुई/तीन जना भएकाहरूलाई फकाएर मन्त्री बनाउनु मेरो गल्ती थियो,’ उनले भने।
उनले आन्दोलनमा सहकर्मीहरू फेरबदल भइरहने भएकाले माधव नेपाल पक्षलाई ठेस पुग्नेगरी अभिव्यक्ति नदिन कार्यकर्ताहरूलाई निर्देशन दिए।
प्रचण्डले माधव नेपाल समूहले एमालेमा रहेर ओली प्रवृत्तिविरूद्ध कि त विजय प्राप्त गर्ने वा विद्रोह गर्ने जिकिर गरे।
एमालेमा ओलीलाई हटाएर एमालेको नेतृत्व लिने अवस्था नभए नेपाल समूहले विद्रोह गर्ने उनले दाबी गरे।
ओलीको प्रतिगमनविरूद्ध आन्दोलनको क्रममा सँगै रहँदा माधव नेपाल र झलनाथ खनाल समूहसँग भावनात्मक सम्बन्ध बढेको उनले जिकिर गरे।
उनले पूर्व एमालेबारे निर्णय गर्दा आफूसँग सल्लाह गर्न पनि पार्टी कार्यकर्तालाई आग्रह गरे।
‘पूर्वएमाले साथीहरूबारे निर्णय गर्दा तपाईंहरूले हेडक्वार्टरसँग सम्पर्क गरेरमात्रै निर्णय गर्नुहोला, आफैं नटुंग्याउनुहोला’, उनले भने।
उनले अबको समय केन्द्रभन्दा जिल्लामा बिताउने र दुई तीन वर्षमा पार्टीलाई एक नम्बरको बनाउने दाबी गरे।