नेपाली कांग्रेसका सांसद गगन थापाले प्रधानमन्त्री केपी शर्मा ओलीलाई प्रधानमन्त्री निवास बालुवाटारभित्र भवनको शिलन्यास र बनिसकेका कोठाको उद्घाटन गर्न सुझाएका छन्।
विकासको काम भयो भनेर प्रधानमन्त्रीले प्रश्न नगर्ने ठाउँमा हुक्के, चिलिमे, बैठके र चौतारे राखेर गफ ठोक्ने गरेको उनले बताए।
प्रतिनिधि सभाको बैठकमा उनले प्रधानमन्त्री पुल सञ्चालनमा आएको २ वर्षमा उद्घाटन गरेकोमा आश्चर्य व्यक्त गरे। उनले निर्माण सुरु भएको २३ वर्षमा बनेको मेलम्ची आयोजनाको उद्घाटनभन्दा सरकारले आयोजना ढिला भयो भनेर माफी माग्नु पर्ने बताए।
उनले संसदमा प्रधानमन्त्रीले ५७ दिनमा पानी आउँछ भनेको तर साढे २ वर्ष लागेको उदाहरण दिए।
'मेलम्ची आउन साढे २ वर्ष लाग्यो। डेढ अर्ब खर्च लाग्यो। नौ महिना कामको सिन्को भाँचिएन। अहिले यत्रो फुर्ति', थापाले भने, '७ देखि ८ वर्षको आयोजनामा २३ वर्ष लायो। अर्ब बढीको भार लाग्दा माफ माग्नु पर्ने हैन। श्रेय लिने होडबाजी। यो आयोजनाबाट सिक्यौं भन्नु पर्नेमा कहिले धारा खोलेर कहिले बाल्टिन थापेर चमत्कार भयो भनेर तमासा गरेको छ।'
उनले माथिल्लो तामाकोसीको अवस्था पनि मेलम्चीको जस्तै हुने बताए।
२०७१ मा चैतमा तामाकोसीको ८० प्रतिशत काम सकिएको र भूकम्प र नाकाबन्दीको असरका कारण ढिलामा ७५ सालमा सकिनु पर्नेमा अहिले पनि नसकिएकोमा पनि उनले प्रश्न उठाए।
'अब ठ्याक्कै मेलम्चीको जस्तो तमासा तामाकोसीमा देखिनेछ', थापाले भने, 'त्यसपछि गज्जबै भयो। चत्मकारै भयो। बिजुली बालिदिनुभयो। पानी झारिदिनुभयो भन्ने कविताहरू अब हामीले सुन्न पाउनेछौं।'
उनले फास्ट ट्रयाक, पश्चिम सेती आयोजना र राष्ट्रिय गौरवका आयोजनाबारे कुराकानी गर्नु पर्नेमा जोड दिए। उनले राष्ट्रिय गौरवका आयोजनामा वर्षौंदेखि समस्या रहेको बताए।
'हाम्रा आयोजना थला पर्नुमा संस्थागत, आभारभूत समस्या छ। मोडालिटीमा, स्रोत, समन्वय, शैलीमा, कानुनमा समस्या छ', थापाले भने, 'नेतृत्वबाट हाम्रो अपेक्षा त यसलाई बदल्ने हो। मिथ्याङ्क ल्याएर गफ चुटेको छ। बसेर यो भयो, त्यो भयो भनेको छ। चालु भएको पुल २ वर्षपछि उद्घाटन गरेको छ। ठेक्का लागेको छैन, सुनकोसी मरिन डाइभर्सनको शिलान्यास गरेको छ। सबस्टेशन चार्ज भएको कहिले? अस्ति गएर थिचेको छ बटन। के को तमासा हो?'
उनले प्रधानमन्त्रीले बालुवाटारबाट प्रत्येक निर्वाचन क्षेत्रमा एउटा सडक बनाउने आयोजनाको उद्घाटनमा पनि प्रश्न गरे।
'अस्ति भर्खर १६५ सडक ट्याक्क बटम थिचेर उद्घाटन गरेको छ। पैसा ३ अर्ब छ, लाग्छ ५७ अर्ब। डिजाइन छैन। पैसा छैन। डिजाइन पनि नचाहिने, पैसा पनि नचाहिने। वर्षको जम्मा ८ देखि ९ सय किलोमिटर बनाउने सडक विभागले २२/२३ सय सडक थप्न संस्थागत क्षमताको हिसाब गर्न नपर्ने', थापाले आक्रोशित हुँदै प्रश्न गरे, 'एउटा निर्वाचन क्षेत्रमा १० वटा ठोक्दिउँ। १६ सय ५० वटा। प्रधानमन्त्रीजस्तो बहादुर भएका बेला ठोक्दिए भइहाल्यो।'
उनले सडक पिच भएको भनेर प्रधानमन्त्रीले दिएको तथ्याङ्कको क्याल्कुलेटर ल्याएर हिसाब गर्नुपर्ने बताए।
'हाम्रो पूर्वाधार निर्माणमा समस्या छ। अहिलेको सरकारमात्र गरेन भन्दिनँ। हाम्रो आधारभूत समस्यामा छ। हाम्रो स्रोतमा छ। काम लगाउने क्षमतामा छ। तमाम समस्या समाधान गरेमात्र अवस्था बदलिन्छ', थापाले भने, 'यही संसदले कानुन बनाउनु छ। नेताले आयोजना छान्ने, कर्मचारीले काम गर्ने अनि निर्माण व्यवसायीले गर्दिन्छ भन्ने तरिका बदल्नुपर्नेछ। प्रधानमन्त्रीजयू, तथ्य र तथ्याङ्कमा टेकेर बहस गर्न म संसदमा निम्तो दिन चाहन्छु। होइन भने सभा-सम्मेलनमा उभिएर प्रश्न नगर्ने ठाउँमा हुक्के चिलिमे बैठके र चौतारे राखेर माथिबाट ठोक्ने अनि माननीय सांसदले बाल कविता सुनाउने। म हामी तपाईंसँग बहस गर्न तयार छौं। ल आउनुस्।'
उनले प्रधानमन्त्रीलाई मन्त्रालगायत र राष्ट्रिय गौरवका आयोजनामा बहसका लागि निम्त्याए।
'सुरू भइसकेका पुल उद्घाटन सक्किएपछि बालुवाटार परिसरमा थुप्रै जग्गा खाली छ। त्यहाँभित्र प्रत्यके दिन एउटा भवनको शिलान्यास गर्नु होला', थापाले व्यङ्ग कसे, 'त्यहाँ बनेको कोठाको उद्घाटन गर्नुहोला।'